ملک میں مہنگائی میں مسلسل اضافہ جاری

اسلام آباد(نمائندہ جنگ)ملک میں مہنگائی میں مسلسل اضافہ جاری ہے اور ہفتہ وار بنیادوں پر بھی مہنگائی 0.48فیصد مزید بڑھ گئی اور 30.16 فیصد ہو گئی ہے، چینی، انڈے، زندہ مرغی، پیاز ، آلو ،دودھ، دہی، بیف، مٹن، پتی، لہسن اور چاول سمیت 19 اشیاء کی قیمتوں میں اضافہ، دال ماش، مونگ، گھی، آٹا، ایل پی جی سستی، 23 اشیائے ضروریہ کی قیمتوں میں استحکام، پاکستان بیورو آف شماریات نے حساس اعشاریوں کے انڈیکس کے تحت اعداد وشمار جاری کر دیے ہیں، رواں ہفتے کھانے پینے کی اشیا زیادہ مہنگی ہوئیں اور 19 اشیائے ضروریہ کی قیمتوں میں اضافہ ریکارڈ کیا گیا، چینی کی فی کلو قیمت میں ایک روپے 20 پیسے اضافہ ہوا جبکہ انڈے فی درجن 21 روپے 50 پیسے، زندہ مرغی 12 روپے 60 پیسے اور پیاز کی قیمت میں 4 روپے 48 پیسے فی کلو اضافہ ہوا، آلو ایک روپے 94 پیسے فی کلو مہنگے ہوئے، اس کے علاوہ دودھ، دہی، بیف، مٹن، دال، چائے کی پتی، لہسن اور چاول سمیت دیگر اشیا کی قیمتوں میں بھی اضافہ ہوا،رواں ہفتے میں 9 اشیائے ضروریہ سستی ہوئیں، دال چنا 3 روپے 93 پیسے فی کلو، ایل پی جی کا گھریلو سلنڈر 9 روپے 74 پیسے سستاہوا جبکہ دال ماش، دال مونگ،گھی اور آٹے کا تھیلا بھی سستاہواجبکہ ایک ہفتے میں 23 اشیائے ضروریہ کی قیمتوں میں استحکام رہا۔