عمران خان حملہ کیس: تحقیقات سے الگ کیے جانے پر جے آئی ٹی ارکان خفا

10 جنوری ، 2023

چیئرمین پاکستان تحریک انصاف (پی ٹی آئی) عمران خان پر حملے کی تحقیقات کے لیے بنائی گئی مشترکہ تحقیقاتی ٹیم (جے آئی ٹی) میں اختلافات سامنے آگئے، جے آئی ٹی کے سربراہ غلام محمود ڈوگر نے اینٹی کرپشن کے ایک افسر کو تفتیش سونپ دی، جے آئی ٹی کے دیگر ارکان تحقیقات سے الگ کیے جانے پر خفا ہوگئے، چار ارکان نے محکمہ داخلہ اور آئی جی پنجاب کو شکایتی خط لکھ دیا۔

ذرائع کے مطابق جے آئی ٹی کے سربراہ غلام محمود ڈوگر نے محکمہ اینٹی کرپشن کے آفیسر انور شاہ کو تحقیقات سونپ دی، جے آئی ٹی کے دیگر ارکان خرم شاہ، نصیب اللّٰہ، احسان اللّٰہ اور ملک طارق محبوب کو ملزم نوید سے تفتیش یا پوچھ گچھ نہیں کرنے دی جا رہی جس پر وہ خفا ہو گئے۔

انہوں نے محکمہ داخلہ اور آئی جی پنجاب کو اس سلسلے میں تحریری طور پر آگاہ کردیا ہے۔

جے آئی ٹی ارکان نے سی سی پی او اور انور شاہ کی تفتیش سے بھی اختلاف کیا ہے۔

ان کا کہنا ہے کہ وہ اس تفتیش کو نہیں مانتے کیونکہ طے پایا تھا کہ روزانہ میٹنگ منٹس تیار کیے جائیں گے اور عمران خان کے ساتھ کنٹینر پر موجود لوگوں کو بھی تفتیش کے لیے بلایا جائے گا مگر ابھی تک کسی کو نہیں بلایا گیا۔

ذرائع کے مطابق جے آئی ٹی ارکان نے یہ بھی کہا ہے کہ ایک سے زائد حملہ آور کا کوئی ٹھوس ثبوت نہیں مل سکا، جرم کی منصوبہ بندی میں مرکزی ملزم سے کسی اور کے تکنیکی یا انسانی رابطے کے شواہد بھی نہیں ملے، ملزم وقاص کا کردار صرف سہولت کار کا تھا۔

جے آئی ٹی ارکان نے کہا کہ یہ بھی طے نہیں کیا جاسکتا کہ معظم کی موت کا ذمہ دار کون تھا؟

انہوں نے یہ بھی کہا کہ کنوینئر اور ان کے معاون ممبر انور شاہ نے انکوائری کی، جے آئی ٹی کے ارکان کی رائے کو مطلوبہ اہمیت نہ دی گئی۔

ان کا کہنا تھا کہ انکوائری میں پیشہ وارانہ مواد بھی شامل نہیں کرنے دیا گیا۔ 17 دسمبر کو ایک ممبر نے سنجیدہ اعتراضا ت اٹھائے لیکن 29 دسمبر کے اجلاس میں اسے نہ بلایا گیا۔

قومی خبریں سے مزید