سابق امریکی نائب صدر مائیک پینس کے گھر سے بھی خفیہ دستاویزات برآمد

امریکا کے سابق صدر ڈونلڈ ٹرمپ کے بعد سابق نائب صدر مائیک پینس کے گھر سے بھی خفیہ دستاویزات برآمد کرلی گئیں۔

غیرملکی میڈیا کے مطابق مائیک پینس کے گھر سے ملنے والے خفیہ دستاویزات ایف بی آئی کو دے دیے گئے ہیں، فی الحال یہ واضح نہیں کہ ان میں معلومات کس نوعیت کی ہیں۔

رپورٹس کے مطابق مائیک پینس کے وکیل کو انڈیانا میں گھر سے گزشتہ ہفتے خفیہ دستاویزات ملیں۔

اس حوالے سے ریپبلکن ہاؤس کی نگراں کمیٹی کے چیئرمین جیمز کومر کا کہنا ہے کہ مائیک پینس نے انڈیانا میں اپنے گھر سے ملی خفیہ دستاویزات سے متعلق رابطہ کیا ہے۔

صدر بائیڈن کی ریاست ڈیلاویئر کی رہائشگاہ سے مزید چھ خفیہ دستاویزات برآمد

صدر جو بائیڈن کے وکیل کے مطابق امریکی صدر کی رہائش گاہ پر محکمہ انصاف کی جانب سے 12 گھنٹے تلاشی کے دوران یہ دستاویزات ملیں، جنھیں قبضے میں لے لیا گیا ہے۔

جیمز کومر کا کہنا ہے کہ پینس نے کانگریس کی کسی بھی تحقیقات میں مکمل تعاون کرنے پر اتفاق کیا ہے۔

واضح رہے کہ امریکی صدر جو بائیڈن اور سابق صدر ڈونلڈ ٹرمپ کے گھروں سے پہلے ہی خفیہ دستاویزات مل چکی ہیں۔