فرمان الہی
نماز کے اوقات
کراچی(اسٹاف رپورٹر) پاکستان کرکٹ بورڈ نے پاکستان اور نیوزی لینڈ کے درمیان پانچ ٹی ٹوئنٹی انٹرنیشنل میچوں کی سیریز کے لیے میچ آفیشلز کے ناموں کا اعلان کردیا ہے۔احسن رضا اور علیم ڈار سمیت پانچ امپائرز سیریز کے میچز سپر وائز کریں گے جن میں آصف یعقوب، راشد ریاض اور فیصل آفریدی بھی شامل ہیں۔زمبابوے کے اینڈی پائی کرافٹ آئی سی سی کے میچ ریفری کی حیثیت سے اپنے فرائض انجام دیں گے۔67 سالہ پائی کرافٹ 144 ٹی ٹوئنٹی انٹرنیشنل میچز میں ریفری کی ذمہ داریاں نبھاچکے ہیں اور پانچوں میچوں میں ذمہ داری نبھاکر وہ سب سے زیادہ ٹی ٹوئنٹی انٹرنیشنل میچوں میں میچ ریفریرز کی فہرست میں دوسرے نمبر پر آجائیں گے۔ اس وقت نیوزی لینڈ کے جیف کرو 175 اور سری لنکا کے رنجن مدوگالے 145 ٹی ٹوئنٹی انٹرنیشنل میچوں میں میچ ریفری کے فرائض انجام دے چکے ہیں۔ علیم ڈار کے علاوہ فیصل آفریدی، آصف یعقوب اور راشد ریاض آئی سی سی کے انٹرنیشنل پینل میں شامل ہیں۔احسن رضا اور علیم ڈار 18 اپریل کو راولپنڈی میں پہلے ٹی ٹوئنٹی انٹرنیشنل میچ میں آن فیلڈ امپائرز ہونگے۔ فیصل آفریدی ٹی وی امپائر ہونگے جبکہ راشد ریاض ریزرو امپائر ہونگے۔20 اپریل کو دوسرے ٹی ٹوئنٹی میچ کے آن فیلڈ امپائرز آصف یعقوب اورعلیم ڈار ہونگے۔ احسن رضا ٹی وی امپائر جبکہ فیصل آفریدی ریزرو امپائر ہونگے۔ 21 اپریل کو تیسرے ٹی ٹوئنٹی میں آن فیلڈ امپائرنگ کی ذمہ داری احسن رضا اور آصف یعقوب کے سپرد کی گئی ہے۔ راشد ریاض ٹی وی امپائر ہونگے جبکہ علیم ڈار ریزرو امپائر ہونگے۔25 اپریل کو لاہور میں چوتھے ٹی ٹوئنٹی کے آن فیلڈ امپائرز فیصل آفریدی اور راشد ریاض ہونگے۔ ٹی وی امپائرآصف یعقوب جبکہ ریزرو امپائر احسن رضا ہونگے۔27 اپریل کو لاہور میں پانچویں ٹی ٹوئنٹی میچ میں آن فیلڈ امپائرز کے طور پر راشد ریاض اور فیصل آفریدی کی تقرری کی گئی ہے۔ علیم ڈار ٹی وی امپائر ہونگے جبکہ آصف یعقوب ریزرو امپائر ہونگے۔
