کوئٹہ(اسٹاف رپورٹر)بلوچستان امن جرگہ کے سربراہ لالہ یوسف خلجی نے کہا ہے کہ صوبے میں بھائی چارے ، امن و امان کے قیام اور قبائلی دشمنیوں کے خاتمے کیلئے علماء اور دیگر مکتبہ فکر سے تعلق رکھنے والے افراد کو اپنا کردارادا کرنا ہوگا ۔ یہ بات انہوں نے جمعیت علماء اسلام (نظریاتی) کے صوبائی امیر مولانا عبدالقادر لونی ، قاری مہر اللہ ، حیات کاکڑ ، مولانا رحمت اللہ حقانی اور دیگر کے اعزاز میں دیئے گئے عشائیے کے موقع پر بات چیت میں کہی ۔ لالہ یوسف خلجی نے کہا کہ بلوچستان میں قبائلی دشمنوں کے باعث نوجوان تعلیم حاصل کرنے کی بجائے ہاتھوں میں کلاشنکوف لئے پھرتے ہیں ، قبائلی دشمنیوں کی وجہ سے صوبے کو جتنا نقصان پہنچا ہے اسے الفاظ میں بیان کرنا ممکن نہیں ۔ انہوں نے کہا کہ بلوچستان امن جرگہ نے صوبے میں قبائلی دشمنیوں کے خاتمے اور امن و بھائی چارے کے فروغ کیلئے شروع دن سے جدوجہد کی ہے اور اب تک درجنوں قبائلی تنازعات کا پرامن تصفیہ کراکے قبائل کو آپس میں شیروشکر کیا ہے ۔ انہوں نے کہا کہ علماء اور دیگر مکتبہ فکر سے تعلق رکھنے والے افراد صوبے سے قبائلی تنازعات کے خاتمے کیلئے ملکر اپنا کردار ادا کریں ، بلوچستان ہم سب کا مشترکہ گھر ہے جس کی ترقی و خوشحالی کیلئے ہمیں لیکر جدوجہد کرنا ہوگی ۔ اس موقع پر جمعیت نظریاتی کے صوبائی امیر مولانا عبدالقادر لونی نے بلوچستان امن جرگہ کے سربراہ لالہ یوسف خلجی کو ہرممکن تعاون کا یقین دلایا۔