فرمان الہی
نماز کے اوقات
کراچی کے پوش علاقے ڈیفنس سے گرفتار ہونے والی ماسی سے تحقیقات کے دوران اہم انکشافات سامنے آئے ہیں، ملزمہ نے 3 سال قید کے دوران ایوارڈ بھی حاصل کیا تھا۔
تفتیشی حکام کا کہنا ہے کہ چوری کے مقدمے میں گرفتار ملزمہ مہرین اسلام آباد کی ایک جیل میں 3 سال گزار چکی ہے، ملزمہ نے تفتیشی حکام کو بیان دیا ہے کہ قید کے دوران جیل میں سلائی کا کام کرنے پر سابق وزیراعظم نے مجھ کو ایوارڈ دیا تھا۔
پولیس کے مطابق ملزمہ مہرین کا تعلق فیصل آباد سے ہے، اس کیخلاف لاہور میں بھی متعدد مقدمات درج ہیں، ملزمہ کیخلاف دسمبر 2024 میں شوکت محمود نے ڈیفنس تھانے میں مقدمہ درج کروایا تھا۔
مقدمے کے متن میں کہا گیا ہے کہ ملزمہ نے چائے میں نشہ آور دوا پلا کر اہلخانہ کو بے ہوش کیا، اس کے بعد گھر سے زیورات نقدی اور دیگر سامان لوٹ کر فرار ہوگئی تھی۔
تفتیشی حکام کا کہنا ہے کہ مذکورہ واردات مجموعی طور پر 65 لاکھ روپے سے زائد کی تھی، ملزمہ چوری کی واردات میں فیروز آباد تھانے میں گرفتار ہوئی تھی۔ اطلاع ملنے پر مدعی مقدمہ فیروز آباد تھانے پہنچے اور ملزمہ کو شناخت کیا۔
تفتیشی افسر کے مطابق ڈیفنس پولیس نے بھی مقدمے میں ملزمہ کی گرفتاری ڈال دی۔ اس کے علاوہ تفتیشی حکام کے مطابق ملزمہ فیروز آباد تھانے میں چوری کے 3 مقدمات میں بھی گرفتار ہے، ملزمہ کلفٹن اور گذری کے کئی گھروں میں بھی کروڑوں روپے کی چوری کرچکی ہے، ملزمہ سے مزید تحقیقات کی جارہی ہیں۔
پولیس نے ملزمہ کو عدالت میں پیش کردیا، عدالت نے ملزمہ کو عدالتی ریمانڈ پر جیل بھیج دیا۔
