• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

دفتر خارجہ میں ری شفلنگ، ایڈیشنل سیکرٹریز اور اہم سفیروں کی تقرریاں

آج کا اخبار
اہم خبریں
02 نومبر ، 2025
اسلام آباد (صالح ظافر) اس ماہ وزارت خارجہ میں اہم تبدیلیاں متوقع ہیں کیونکہ پانچ اہم عہدے، ایڈیشنل فارن سیکریٹری کے، خالی ہونے والے ہیں، جبکہ کم از کم پانچ بڑے عالمی دارالحکومتوں میں پاکستان کے نئے سفیر تعینات کیے جا رہے ہیں۔ اعلیٰ سفارتی ذرائع نے ہفتے کی شام جنگ کو بتایا کہ ایڈیشنل فارن سیکرٹری برائے امریکہ مریم مدیحہ آفتاب کو عائشہ فاروقی کی جگہ ملک کا آئرلینڈ میں سفیر مقرر کر دیا گیا ہے۔ عائشہ کو پرتگال کے لیے سفیر مقرر کیا گیا ہے، جبکہ ہیڈکوارٹرز میں جنوبی ایشیا کے امور کے ڈائریکٹر جنرل، الیاس محمود نظامی، رومانیہ کے لیے پاکستان کے سفیر ہوں گے۔ موجودہ عہدے دار، محمد ارشاد جان پٹھان، اسلام آباد واپس آ گئے ہیں اور انہیں ڈائریکٹر جنرل، اسٹریٹیجک کمیونیکیشن ڈویژن مقرر کیا گیا ہے۔ شاندار سفارتکار، سفیر شفقت علی خان، آئندہ ہفتے ابوظہبی پہنچ رہے ہیں تاکہ متحدہ عرب امارات (یو اے ای) کے لیے پاکستان کے سفیر کے طور پر اپنی ذمہ داریاں سنبھالیں۔ وہ حال ہی تک وزارت خارجہ کے ترجمان اور وزارت میں خصوصی سیکریٹری کے طور پر تعینات تھے۔ اس وقت وہ سعودی عرب میں عمرہ کی ادائیگی کے لیے موجود ہیں۔ ان کی زوجہ، مریم مدیحہ، کو بھی آئرلینڈ میں پاکستان کی سفیر مقرر کیا گیا ہے۔ دلچسپ بات یہ ہے کہ ذرائع کے مطابق شوہر اور بیوی دونوں آئندہ سال فارن سیکریٹری کے عہدے کے امیدواروں میں شامل ہوں گے، جب موجودہ فارن سیکریٹری آمنہ بلوچ ریٹائر ہوں گی۔ متحدہ عرب امارات کے سابق سفیر فیصل نیاز ترمذی جو اب روس کے لیے سفیر بن گئے ہیں، وہ آئندہ ماہ کے اوائل میں کریملن میں روسی صدر ولادیمیر پوتن کو اپنی سفارتی اسناد پیش کریں گے۔
اہم خبریں سے مزید