• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گلشن اقبال میں مکان پر قبضے کی مبینہ کوشش، شدید فائرنگ سے خوف و ہراس

آج کا اخبار
اہم خبریں
29 نومبر ، 2025
کراچی (اسٹاف رپورٹر، این این آئی) کراچی کے علاقے گلشن اقبال 13-ڈی ون میں مکان پر قبضے کی مبینہ کوشش ،شدید فائرنگ سے خوف و ہراس، اشتعال پھیل گیا، واقعے کی ویڈیو وائرل ہوگئی جس میں مسلح افراد کو فائرنگ کرتے دیکھا جاسکتا ہے،علاقہ مکین بھی جمع ہوگئے، صورتحال کشیدہ ہونے پر گھر خالی کرانے کا عمل روک دیا گیا، ایس ایچ او گلشن اقبال نعیم راجپوت نے بتایا کہ گلشن اقبال بلاک تیرہ ڈی میں ایک مکان پر عدالت کے حکم پر بیلف مکان خالی کرانے دیگر افراد کے ہمراہ آیا تھا، واقعہ اعلیٰ حکام کے علم میں ہے، مزید تفتیش جارہی ہے۔ تفصیلات کے مطابق گلشن اقبال میں عدالتی حکم پر مکان خالی کرانے کے معاملے پر شدید فائرنگ سے اشتعال پھیل گیا ۔جائے وقوعہ کی موبائل فون سے بنائی گئی ویڈیو میں ایک شخص کو خود کار ہتھیار ہاتھ میں لیے بھی دیکھا گیا جبکہ اس موقع پر پولیس کی نفری بھی موجود تھی ۔ جس گھر کو خالی کرایہ جا رہا تھا اس کے مکین کا کہنا تھا کہ گزشتہ 40سال سے اس گھر میں مقیم ہوں اور اس کی گواہی علاقہ مکین بھی دے سکتے ہیں ۔ایس ایچ او گلشن اقبال نعیم راجپوت نے بتایا کہ گلشن اقبال بلاک تیرہ ڈی میں ایک مکان پر عدالت کے حکم پر بیلف مکان خالی کرانے دیگر افراد کے ہمراہ آیا تھا۔ پولیس صرف انھیں تحفظ دینے گئی تھی پولیس کا کام گھر خالی کرانا نہیں ہے ۔مکان خالی کرانے کے دوران جو فائرنگ کا واقعہ پیش آیا ہے وہ اعلیٰ افسران کے علم میں ہے اور اس کی مزید تفتیش کی جا رہی ہے ۔ کراچی کے علاقے گلشن اقبال 13-ڈی ون میں مکان پر مبینہ قبضے کی کوشش کی گئی، واقعے کی ویڈیو میں فائرنگ ہوتے دیکھی جاسکتی ہے۔متاثرہ رہائشی کا کہنا ہے کہ وہ مکان میں 40سال سے رہ رہے ہیں۔ ایس ایس پی ایسٹ ڈاکٹر فرخ نے کہا کہ کچھ افراد کورٹ آرڈر کے ساتھ آئے، بیلف بھی ان کے ہمراہ تھا۔ انہوں نے کہا کہ جھگڑے کے دوران پولیس پہنچی اور حالات کو قابو کیا، تاہم منظرعام پر کچھ ویڈیوز آئی ہیں جن کی چھان بین کر رہے ہیں۔ایس ایس پی نے کہا کہ ویڈیو میں ایک شخص کو اسلحہ لوڈ کرتے دیکھا گیا ہے، کوشش ہے فائرنگ میں ملوث افراد کے خلاف کارروائی کی جائے۔
اہم خبریں سے مزید