• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہفتہ وار مہنگائی کی شرح میں اضافہ، سالانہ بنیاد پر 4.32 فیصد تک پہنچ گئی

آج کا اخبار
اہم خبریں
29 نومبر ، 2025
اسلام آباد( تنویرہاشمی، این این آئی ) ملک میں گزشتہ ہفتے کے دوران 14اشیا کی قیمتوں میں اضافہ اور12کی قیمتوں میں کمی ریکارڈ کی گئی، 25 اشیائے ضروریہ کی قیمتوں میں استحکام رہا، ملک میں ضروری اشیا کی قیمتوں میں ہفتہ وار بنیادوں پر 0.73فیصد اور سالانہ بنیادوں پر4.32فیصد اضافہ ریکارڈ کیا گیا، پاکستان بیورو برائے شماریات (پی بی ایس) کی جانب سے قیمتوں کے حساس اشاریہ کے بارے میں ہفتہ وار رپورٹ کے مطابق گزشتہ ہفتہ کے دوران روزمرہ استعمال کی 12ضروری اشیا کی قیمتوں میں کمی اور 25کی قیمتوں میں استحکام رہا، اسکے برعکس 14اشیا کی قیمتوں میں اضافہ ہوا۔گزشتہ ہفتے کے دوران ٹماٹر کی، پیاز ، آلو ، نمک پائوڈر ، دال چنا ، لہسن ، انڈے اور آٹے کی قیمت میں کمی ہوئی،اس کے برعک بجلی ، ایل پی جی، دال مونگ، بناسپتی گھی، کیلا، کوکنگ آئل، خشک دودھ ، سگریٹ ، جلانے کی لکڑی ،چینی اور بیف کی قیمت میں اضافہ ہوا۔دریں اثناءوزارت خزانہ کی ماہانہ اقتصادی رپورٹ کے مطابق اکتوبر میں سالانہ بنیاد پر مہنگائی کی شرح کے لحاظ سے تعلیمی شعبے میں10.6 فیصد، صحت9.7فیصد، کپڑے اور جوتے 8.1 فیصد ، ٹرانسپورٹ 6.7فیصد ، نان تلف پذیر اشیاء 6.3فیصد ، ریسٹورنٹ اور ہوٹل6.1فیصد اور بجلی اور گیس کے شعبے میں مہنگائی کی شرح میں 4.2 فیصدا ضافہ ہوا ، رپورٹ کے مطابق جولائی تاستمبر کے تین ماہ میں مالیاتی خسارہ میں324ارب روپے کا اضافہ ہوا اور 2120ارب روپے مالیاتی خسارہ رہا جوگزشتہ برس1896ارب روپے تھا، جولائی تا اکتوبر کے چار ماہ میں ترسیلات زر 9.3 فیصد اضافے سے12ارب85کروڑ ڈالر وصول ہوئیں ،برآمدات 2فیصد اضافے سے 10 ارب60کروڑڈالر،درآمدات 9.6فیصداضافے سے 20ارب70کروڑ ڈالر رہیں، کرنٹ اکائونٹ خسارہ میں کمی ہوئی اور غیر ملکی سرمایہ کاری 26فیصد کمی کے ساتھ 75کروڑ ڈالر رہیں ، رپورٹ کے مطابق 27نومبر کو پاکستان کی کرنسی کی قدر 280 روپے فی ڈالر رہی جو گزشتہ برس 278 روپے فی امریکی ڈالر تھی ، 14نومبر کوغیر ملکی زرمبادلہ کے مجموعی ذخائر 19ارب 70کروڑ ڈالر تھے جو گزشتہ برس 16ارب ڈالر تھے ۔
اہم خبریں سے مزید