فرمان الہی
نماز کے اوقات
کراچی (سید محمد عسکری/ اسٹاف رپورٹر) پاکستان اکیڈمی آف سائنسز نے انٹرنیشنل سینٹر فار کیمیکل اینڈ بایولوجیکل سائنسز (آئی سی سی بی ایس) کو نجی افراد کے حوالے کرنے کے ممکنہ حکومتی فیصلے پر شدید تشویش کا اظہار کیا ہے اور وزیرِاعلیٰ سندھ سید مراد علی شاہ سے مطالبہ کیا ہے کہ ادارے کی قانونی حیثیت برقرار رکھی جائے۔ اکیڈمی کے صدر ممتاز قومی سائنسدان پروفیسر ڈاکٹر کوثر عبداللّٰہ ملک نے وزیرِاعلیٰ سندھ کو ارسال کردہ خط میں کہا ہے کہ اطلاعات کے مطابق آئی سی سی بی ایس کو ’’بغیر کسی مضبوط جواز‘‘ اور ’’مناسب قانونی تقاضوں‘‘ کے نجی افراد کے حوالے کرنے کی تیاریاں کی جا رہی ہیں، جو قومی سائنسی ڈھانچے کے لئے نقصان دہ ہو سکتی ہیں۔ آئی سی سی بی ایس پاکستان کے بہترین سائنسی اداروں میں شمار ہوتا ہے اور اس کے محققین کو اعلیٰ قومی اعزازات سے نوازا جا چکا ہے۔ خط میں اس امر کا بھی ذکر ہے کہ ادارے سے تربیت یافتہ ماہرین ملک کی مختلف جامعات اور تحقیقاتی مراکز میں اپنی خدمات انجام دے رہے ہیں۔ نجی شعبے کے پاس ایسے غیر منافع بخش اعلیٰ تحقیقی اداروں کو چلانے کا تجربہ نہ ہونے کے برابر ہے۔ انہوں نے وزیرِاعلیٰ سندھ کو مشورہ دیا کہ ادارہ اپنی موجودہ حیثیت میں جامعہ کراچی کا حصہ ہی رہے، جبکہ اگر انتظامی امور سے متعلق کوئی مسائل موجود ہیں تو انہیں اصلاحات کے ذریعے حل کیا جا سکتا ہے۔ رپورٹ کے مطابق پاکستان اکیڈمی آف سائنسز نے اس سلسلے میں ہر ممکن تعاون کی پیشکش بھی کی ہے۔
