فرمان الہی
نماز کے اوقات
کراچی (اسٹاف رپورٹر) بنگلہ دیش کرکٹ ٹیم کے سابق کپتان شکیب الحسن نےانکشاف کیا ہے کہ جب اُن کے بولنگ ایکشن پر اعتراض کیا گیا اور پھر 2024 میں کاؤنٹی کلب سرے کے ساتھ سیزن کے بعد اُن پر پابندی عائد کی گئی، تو وہ تھوڑا بہت جان بوجھ کر غیرقانونی ایکشن کے ساتھ بولنگ کر رہے تھے۔ یاد رہے کہ گزشتہ سال دسمبر میں لوفبرا یونیورسٹی میں کیے گئے ٹیسٹ میں ان کے ایکشن کو غیر قانونی قرار دیا گیا تھا جس کے بعد شکیب پر ای سی بی کی جانب سے تمام مقابلوں میں بولنگ کرنے پر پابندی عائد کی گئی تھی۔آئی سی سی کے قوانین کے مطابق، یہ پابندی خودبخود انٹرنیشنل کرکٹ میں بھی نافذ ہوگئی تھی۔ انہوں نے ایک پوڈکاسٹ میں گفتگو کرتے ہوئے کہا کہ میرے خیال میں میں تھوڑا بہت جان بوجھ کر ایسا کر رہا تھا کیونکہ میں نے ایک میچ میں 70 سے زیادہ اوورز بولنگ کی تھی۔ میں نے اپنی ٹیسٹ کرکٹ میں کبھی 70 اوورز نہیں پھینکے، میں بہت تھک گیا تھا۔ سوچ رہا تھا امپائر وارننگ دیں گے ، رپورٹ کیے جانے پر میں نے شکایت بھی نہیں کی اور پھر ایکشنٹیسٹ میں فیل ہوا، دوبارہ ٹیسٹ دیا اور وہ کلیئر ہوا۔ خیال رہے کہ شکیب الحسن کو رواں برس کے آغاز میں بولنگ کیلئے کلیئر قرار دیا گیا۔
