چیئرمین پیپلز پارٹی بلاول بھٹو زرداری کا کہنا ہے کہ جنوبی پنجاب کی محرومیوں کے دن ختم ہو چکے، لوگ ترقی کی روشن صبح، خوشحالی اور مساوی مواقع کے لیے تیار ہو جائیں، یہ جان کر افسوس ہوا کہ جنوبی پنجاب کی شرح خواندگی صرف بارہ فیصد ہے۔
بلاول ہاؤس لاہور میں پی پی جنوبی پنجاب کے کارکنوں سے خطاب کرتے ہوئے بلاول بھٹو نے کہا کہ پیپلز پارٹی کے پاس غربت کے مارے عوام کے لیے بہترین منصوبے ہیں، آئندہ انتخابات میں جنوبی پنجاب کے لوگوں کو تخت رائیونڈ سے آزادی مل جائے گی۔
بلاول بھٹو کا کہنا تھا کہ ہارون آباد میں ان کے کارکن کے قاتل دندناتے پھر رہے ہیں، نون لیگ کی حکومت پی پی کارکنوں کے قاتلوں کو گرفتار کرنے کے لیے تیار نہیں، شفاف تحقیقات کا اعلان کرنے والی پنجاب حکومت خود ہی اس جرم میں ملوث ہے۔