زرداری بتائیں کس کے بجلی گھر کیلئےگیس مانگی جا رہی ہے: سعد رفیق

وزیر ریلوے خواجہ سعد رفیق نے کہا ہے کہ زرداری صاحب بتائیں کہ جس بجلی گھر کے لیے گیس مانگی جارہی ہے وہ کس کا ہے؟ یہ صرف اپنی ترقی چاہتے ہیں۔

جیکب آباد میں جلسے سے خطاب کرتے ہوئے انہوں نے کہا کہ زرداری صاحب نوری آباد بجلی گھر کا پرائیویٹ اونر کون ہے، زرداری صاحب مجھے کچھ کہنے کی ضرورت نہیں، عوام آپ کو زیادہ جانتے ہیں، لوگوں کو کب تک بے وقوف بناؤ گے، ایک ارب کی بینک گارنٹی دو گیس لے لو۔

سعد رفیق نے کہا کہ یہ پاکستان کی نہیں اپنے بنگلوں کی ترقی چاہتے ہیں، ہم سے کیا بات کرنی ہے، جو دھرا گیا ہے اس کا جواب دو، ہماری زبان بند تھی، ہم زیادہ بولنا نہیں چاہتے تھے، شکریہ آصف زرداری، شکریہ بلاول زرداری، ہمیں موقع دیا کہ ہم پوری بات کہہ ڈالیں، گھر گھر دستک دیں گے،سندھ سے پیپلزپارٹی کا بوریا بستر گول کریں گے۔

انہوں نے کہا کہ ذمہ داری سندھ حکومت کی کام کرے نواز شریف، تم چوری کی چُوری کھاتے ہو، کام نہیں کرتے، ن لیگ جاگیردارانہ سیاست ختم کرے گی، وڈیرے کی سیاست نہیں چلنے دیں گے، دیکھیں گے کہ عام انتخابات میں دادا گیری جیتتی ہے یا عام آدمی کا ووٹ جیتتا ہے، کراچی کو کچرے کا ڈھیر بنادیا، سندھ کے شہروں کو کھنڈر بنا دیا۔

وزیر ریلوے کا کہنا تھا کہ 10سال میں 45ارب روپے جیکب آباد میں آئے، کہیں لگے نظر آتے ہیں؟بہت موقع دیا، شاید سدھر جائیں، لیکن یہ سدھرنے والے نہیں ہیں، تم نے تو لاڑکانہ بھی کھنڈر میں بدل دیا، پاکستان کا کیا کرو گے، کوئی غلط فہمی میں نہ رہے، ن لیگ سندھ میں اپناراستہ بنائے گی۔