پاکستان کے سرکاری دورے پر آنے والے لبرل ڈیموکریٹک پارٹی سے تعلق رکھنے والے جاپان کے خارجہ امور کے وزیر مملکت 58 سالہ نوباو کشی کو پاکستان میں پنجاب کے وزیراعلیٰ شہباز شریف سے کافی حد تک سیاسی مشابہت دی جاسکتی ہے اور انہیں ایک طرح سے جاپانی شہباز شریف بھی کہا جاسکتا ہے ۔
وہ جاپان کے موجودہ وزیراعظم مسٹر شنزو آبے کے چھوٹے بھائی ہیں جو پاکستانی وزیراعظم نواز شریف کی طرح تیسری مرتبہ جاپان کے وزیراعظم ہیں۔ ان کے والد بھی جاپان کے وزیر خارجہ رہ چکے جبکہ ان کے دادا اور ان کے بھائی بھی جاپان کے وزیراعظم منتخب ہوئے۔
مسٹر نوباو کشی کا خاندان تین پشتوں سے کسی نہ کسی طرح سے جاپان کی حکمرانی میں رہا ہے۔ ان کے دادا مسٹر نوبوسوکے کشی 18 جنوری 1957 سے 1960 تک جاپان کے وزیر اعظم رہے۔ دادا نوبوسو کے کشی کے بھائی ایساکو ساتو بھی اس کے بعد جاپان کی 39 ویں وزیراعظم منتخب ہوئےجس کے بعد نوباو کشی کے بھائی مسٹر شنزو آبے جاپان میں وزارت عظمیٰ کے طور پر طویل ترین عرصے کیلئے خدمات کا ریکارڈ قائم کرچکے ہیں۔
شنزو آبے ان دنوں جاپان کے تیسری مرتبہ وزیر اعظم ہیں۔ آبے سال 2006 سے 2007 تک جاپان کے پہلے وزیراعظم جبکہ سال 2012 سے 2014 تک دوسری مرتبہ وزیراعظم جاپان منتخب ہوئے۔
شنزو آبے سال 2014 سے اب تک جاپان کے 57 ویں وزیراعظم کے طور پر خدمات سرانجام دے رہے ہیں۔
ذرائع کے مطابق جس طرح تیسری مرتبہ پاکستانی وزیراعظم بن کر تاحال خدمات سرانجام دینے والے نواز شریف کے ساتھ ان کے بھائی وزیراعلیٰ پنجاب شہباز شریف کی ورکنگ ریلیشن شپ اور کوآرڈی نیشن ہے بالکل اسی طرح جاپان کے وزیر مملکت نوباو کی بھی اپنے وزیر اعظم بھائی شنزو آبے سے انتہائی انتظامی کوآرڈینیشن ہے۔
کہا جارہا ہے کہ نوباو کشی اپنے وزیراعظم بھائی کا خاص پیغام لے کر پاکستان آرہے ہیں اور یہ بھی کہا جا رہا ہے کہ ان کے اس دورے کے بعد ممکنہ طور پر جاپانی وزیراعظم شنزو آبے بھی مستقبل قریب میں پاکستان کا دورہ کرسکتے ہیں تاہم اس امر کی حتمی طور پر تصدیق نہیں ہوسکی۔
فرمان الہی
نماز کے اوقات
