قائم مقام بھارتی ڈپٹی ہائی کمشنر کی دفتر خارجہ طلبی

پاکستان نے قائم مقام بھارتی ڈپٹی ہائی کمشنر رگھورام کو دفتر خارجہ طلب کرکے بھارت کی جانب سے لائن آف کنٹرول کی خلاف ورزیوں پرشدید احتجاج کیا ہے ۔

دفتر خارجہ میں ڈی جی ساؤتھ ایشیاء ڈاکٹر فیصل نے احتجاجی مراسلہ بھارتی قائم مقام ڈپٹی ہائی کمشنر کے حوالے کیا۔

مراسلے میں کہا گیا ہے کہ بھارت کی جانب سے جان بوجھ کر شہری آبادیوں کو نشانہ بنانا قابل مذمت اور انسانی وقار کے خلاف ہے۔

مراسلے میں مزید کہا گیا ہے کہ بلا اشتعال فائرنگ سیز فائر معاہدے اور انسانی حقوق کی بھی خلاف ورزی ہے۔

بھارتی فوج کی 28جون کو آزاد کشمیر کے نکیال سیکٹر میں بلااشتعال فائرنگ سے ایک شہری عبدالوہاب شہید اور 4زخمی ہوئے تھے۔