ہاکی، جن خدشات کا اظہار کیا تھا، درست ثابت ہوئے، گول کیپر عمران

17 جولائی ، 2017

کراچی(اسٹاف رپورٹر) پاکستان ہاکی ٹیم کے سینئر گول کیپر عمران بٹ نے کہا ہے کہ قومی ٹیم کو جب بھی میری ضرورت ہوگی میری خدمات حاضر ہیں، ہاکی ورلڈ لیگ سے تین ماہ قبل جن خدشات کا ذکر کیا تھا وہ درست ثابت ہوئے ہیں، پسند نا پسند پر ٹیمیں بنائیں جائیں گی تونتائج مایوس کن ہی آئیں گے۔انہوں نے کہاکہ پاکستان ہاکی فیڈریشن کے کاموں پر کبھی کوئی تنقید نہیں کی ہے اور نہ ہی کوچنگ اسٹاف کے بارے میں کچھ کہنا چاہتا ہوں یہ فیڈریشن کا معاملہ ہے۔ ایسی باتیں منظر عام پر ہیں کہ ٹیم مینجمنٹ میں تبدیلی ہونے جا رہی ہے جس کے اعلان کے بعد اپنے مستقبل کا فیصلہ کرونگا۔

عمران بٹ کا کہنا تھا کہ ہاکی ورلڈ لیگ میں 28 گول ہونا مایوس کن ہے، میرے سات آٹھ سالہ کیرئر میں کبھی کسی ٹورنامنٹ میں مجھے اتنے گول نہیں ہوئے ہیں۔ ایک سوال کے جواب میں عمران بٹ نے کہا کہ سینئر کھلاڑیوں کی ابھی قومی ٹیم کو اشد ضرورت ہے۔ مجھے فخر ہے کہ گذشتہ چیمپئینز ٹرافی میں میری کارکردگی کی بنا پر پاکستان ٹیم نے ٹورنامنٹ کا فائنل کھیلا تھا اب بھی تیاری اور اپنی فٹنس پر توجہ دے رہا ہوں۔ فیڈریشن جب بھی مجھے موقع دے گی اپنی بھرپور صلاحیتوں کا مظاہرہ کرونگا۔ سینئر کھلاڑی اگر ہاکی ورلڈ لیگ ٹورنامنٹ کےا سکواڈ میں شامل کیے جاتے تو پاکستان ٹیم ٹاپ فور میں آسانی کے ساتھ آ سکتی تھی، پسند نا پسند کو ختم کر کے پاکستان میں ہاکی لیگ کا آغاز کرنا وقت کی اشد ضرورت ہے جس میں صوبوں کے ساتھ ڈیپارٹمنٹل ٹیمیں شامل کی جائیں۔ عمران بٹ کا کہنا تھا کہ پاکستان ہاکی چلتی رہے گی یہ ختم نہیں ہوگی تاہم اچھی پوزیشن اور ماضی کے اعزازات حاصل کرنے کے لیے گراس روٹ لیول پر کام کرنے ضرورت ہے۔

ٹیم مینجمنٹ میں تبدیلی کرنا یا نہ کرنا میرا اس سے کوئی تعلق نہیں ہے یہ فیڈریشن کا معاملہ ہے۔ میرا کام محنت کر کے اچھا پرفارم کرنا ہے، ابھی چند سال مزید پاکستان ہاکی ٹیم کی نمائندگی کر سکتا ہوں۔

تازہ ترین