دوسرا ٹی 20:پریرا اور آملہ نے ورلڈ الیون کو فاتح بنادیا

13 ستمبر ، 2017

آزادی کپ کے دوسرے ٹی 20 میچ میں ورلڈ الیون نے سنسنی خیز مقابلے کے بعد پاکستان کو 7وکٹوں سے شکست دے دی اور تین میچوں کی سیریز 1-1 سے برابر کردی ،آخری میچ جمعہ 15 ستمبر کو کھیلا جائے گا ۔

ورلڈ الیون کو آخری دو گیندوں پر 6 رنز درکار تھے کہ پریرا نے آخری اوور کی پانچویں گیند پر چھکا لگاکر جیت پاکستان سے چھین لی، رومان رئیس آخری اوور میں 13رنز کا دفاع کرنے میں ناکام رہے اور میچ ایک گیند پہلے ہی ختم ہوگیا ۔

اوپننگ بیٹسمین ہاشم آملہ نے آخر تک ایک اینڈ سنبھالے رکھا 55 گیندوں پر 72رنز کی قیمتی اننگز کھیلی،انہوں نے اس دوران 2چھکے اور 5چوکے بھی لگائے ، انہیں مین آف دی میچ قراردیا گیا ۔

اس سے قبل پاکستان نے ٹاس جیت کر پہلے کھیلتے ہوئے مقررہ 20 اوورز میں 174رنز بنائے اور ورلڈ الیون کے لئے 175 رنز کا ہدف سیٹ کیا ،گرین شرٹس کی طرف سے بابر اعظم 45رنز کے ساتھ ٹاپ اسکورر رہے ، احمد شہزاد نے 43 جبکہ شعیب ملک نے 39رنز کی نمایاں اننگز کھیلی۔

ورلڈ الیون کی طرف سے ہاشم آملہ اور تمیم اقبال نے اننگز شروع کی اور پہلی وکٹ پر 47 رنز کا پر اعتماد آغاز فراہم کیا ، تمیم اقبال 1چھکے اور 2چوکوں کی مدد سے 23رنز بنائے اور اپنی وکٹ سہیل خان کے حوالے کردی۔

ہاشم آملہ نے اس کے بعد ٹم پین کے ساتھ مجموعے میں 24 رنز کا اضافہ کیا ، ایک چوکے کی مدد سے 10رنز بنانے والے ٹم پین کو عماد وسیم نے قابو کیا۔

ورلڈ الیون کے تیسرے آئوٹ ہونے والے بیٹسمین کپتان فاف ڈوپلیسی نے انہوں نے 2چھکوں لگائے اور ٹیم کے اسکور میں 20 رنز کا اضافہ کیا،ورلڈ الیون کے کپتان کو محمد نواز نے پویلین کی راہ دکھائی ۔

ہاشم آملہ نے اس دوران اپنی نصف سنچری مکمل کی اور نئے آنے والے بیٹسمین تھیسارا پریرا کے ساتھ 69 رنز کی شراکت قائم کی۔