زائرہ وسیم کو ہراساں کئے جانے پر سخت رد عمل سامنے آگیا

بھارت میں خواتین کس حد تک غیر محفوظ ہیں ، اس کا واضح ثبوت میگا ہٹ فلم ’دنگل‘ کی اداکارہ زائرہ وسیم کے ساتھ فضائی سفر کے دوران گزشتہ روز پیش آنے والا واقعہ ہے ۔

زائرہ کا تعلق مقبوضہ کشمیرکے علاقے سری نگر سے ہے ۔ زائرہ کے ساتھ دست درازی کا واقعہ پیش آنے پر بھارت میں شدید ردِ عمل بھی سامنے آیا ہے۔

کئی اہم شخصیات نے فوری طور پر سماجی ویب سائٹسپراس کی مذمت کی اورملزم کی گرفتاری کا مطالبہ کیا۔

امریکی نشریاتی رپورٹ کے مطابق مقبوضہ کشمیر کی وزیر اعلیٰ محبوبہ مفتی نے اپنی ایک ٹویٹ میں کہا ہے ’خواتین کو ہراساں کرنے یا ان کے خلاف جرم کا ارتکاب کئے جانے کے کسی بھی واقعے پر فوری طور پر اور مؤثر انداز سے کارروائی ہونی چاہیے۔ زائرہ کے ساتھ جو کچھ ہوا دو بیٹیوں کی ماں ہونے کی حیثیت سے میں اس سے خوف زدہ ہوں۔ امید ہے متعلقہ حکام سخت کارروائی کریں گے۔‘

اُن کے پیش رو اور حزبِ اختلاف کی سب سے بڑی علاقائی جماعت نیشنل کانفرنس کے کارگزار صدر، عمر عبد اللہ نے ٹوئیٹر پر لکھا ہے’جس مسافر نے یہ حرکت کی اُس کی شناخت 'ائیر وسترا کی طرف سے پولیس کے سامنے ہونی چاہیےاور قانونی کارروائی کرنے کے لئے مقدمہ درج کیا جانا چاہیے۔‘

'وسترا ائیر لائنز کی جانب سے ایک ٹویٹ میں کہا گیا ہے کی وہ زائرہ کے ساتھ ہے ۔واقعے کی تحقیقات شروع ہوگئی ہے۔ ائیرلائن زائرہ کے ساتھ بھرپور تعاون کرے گی ۔ ایسا رویہ ناقابلِ برداشت ہے اور اس سلسلے میں سخت اقدام اٹھایا جائے گا۔

بھارت میں خواتین کے قومی کمیشن کی سربراہ ریکھا سنگھ اور مہاراشٹر ودلی صوبوں میں ان کی ہم منصب عہدیداروں نے بھی اس واقعے کا سخت نوٹس لیا ہے جبکہ ممبئی پولیس نے اس سلسلے میں باضابطہ ایف آئی آر درج کرکے ملزم کی تلاش شروع کر دی ہے۔