پاکستان میں معصوم بچوں کےقتل کے خلاف ناروے میں مظاہرہ

پاکستان میں معصوم بچوں کے ساتھ زیادتی اور قتل کے خلاف نہ صرف ملکی سطح پر احتجاج جاری ہے بلکہ ان واقعات نے اوورسیز پاکستانیوں کو بھی دکھی اور افسردہ کردیا ہے۔

گذشتہ روز ناروے کے دارالحکومت اوسلو میں پاکستانی سفارتخانے کے باہر پرامن احتجاجی مظاہرہ کیا گیا، جس میں خواتین اور بچے بھی شریک تھے۔ مظاہرین نے مطالبہ کیا کہ اس طرح کے واقعات کو روکنے کے لیے فوری اقدامات کئے جائیں اور ان واقعات میں ملوث افراد کو کڑی سے کڑی سزا دی جائے۔

مظاہرے میں ناروے میں مقیم اہم سماجی، ادبی اور کاروباری شخصیات نے شرکت کی اور اس دوران سفارتخانے کے ایک عہدیدار کو ایک یاداشت بھی پیش کی گئی۔

یاداشت میں پاکستان کے شہرقصور میں کمسن بچی زینب کے ساتھ زیادتی اور اسکے قتل اور اس طرح کے دیگر واقعات کی پرزورالفاظ میں مذمت کی گئی ہے اور ان واقعات کو انتہائی قابل افسوس اور شرمناک قرار دیا گیا ہے اور مطالبہ کیا ہے کہ اس طرح کے واقعات کو روکنے کے لیے فوری اور ٹھوس اقدامات کئے جائیں اور موثر قانونی سازی کے ذریعے ان واقعات کو روکا جائے۔

مزید یہ کہ زینب کے واقعے کو مثال بنا کر اس واقعے میں ملزمان کے خلاف فی الفور کارروائی کی جائے، اور انہیں عبرتناک سزا دی جائے۔

مظاہرین نے پاکستان میں بچوں کے ساتھ زیادتی کے خلاف پلے کارڈز اٹھا رکھے تھے۔ مظاہرین کا کہناتھا کہ ہم نارویجین پاکستانی بھی پاکستان کے مسائل کو اپنے مسائل سمجھتے ہیں اور خاص طور پر زینب کے واقعے پر ہمیں بہت دکھ ہے۔

مظاہرین کا کہنا تھا کہ اس واقعے نے ہماری روح کو ہلا کر رکھ دیا اور اس پر پوری پاکستانی قوم سمیت اوورسیز پاکستانی بھی شرمندہ ہیں۔ ان واقعات سے پاکستانی معاشرے کے بارے میں منفی تاثر پھیلا ہے۔

مظاہرین نے اس طرح کے دیگر واقعات میں پر اپنے جذبات کے اظہارکے لیے ایک منٹ کی خاموشی اختیار کی اور سفارتخانے کے باہر پھول رکھے۔