بالی ووڈ کی متنازع فلم ’پدماوت‘ کافی عرصے تک تنازعات کا شکار رہنے کے بعد آخر کار ریلیز کر دی گئی لیکن اب بھی بھارت کی کئی ریاستوں میںاس فلم پر پابندی عائد ہے۔
بھارتی میڈیا کے مطابق سنجے لیلا بھنسالی کی ہدایت کاری میں بننے والی فلم ’پدماوت‘ میں رنویر سنگھ نے علائوالدین خلجی کا ایسا شاندار کردار ادا کیا ہے کہ دیکھنے والےنہ صرف حیران رہ گئے ہیں بلکہ ان کے اس روپ کو بے حد پسند بھی کیا ۔
پدماوت کی ریلیز کو ابھی ایک ہفتہ بھی پورا نہیں ہوا کہ رنویر سنگھ نے اس فلم کے لیے پہلا ایوارڈحاصل کرلیا۔ اس سےزیادہ حیرت کی بات یہ ہے کہ ان کو ایوارڈ دینے والےاور کوئی نہیں بلکہ بالی ووڈ کے شہنشاہ ’بگ بی‘ یعنی امیتابھ بچن ہیں۔
بگ بی کو رنویر سنگھ کی اداکاری اس قدر پسند آئی کہ ان سے رہا نہ گیا اور انہوں نے اپنے ہاتھ سے ایک تعریفی نوٹ خط کی شکل میں لکھ کر پھولوں کے گلدستے کے ساتھ ان کو ایوارڈ کے طور پر پیش کیا جس کی تصویر رنویر سنگھ نے سوشل میڈیا پر بھی شیئر کی اور ساتھ میں لکھا کہ’مجھے میرا ایوارڈ مل گیا، سر بچن۔‘
Mujhe mera award mil gaya @SrBachchan pic.twitter.com/zlo9B6G2od
— Ranveer Singh (@RanveerOfficial) January 29, 2018
رنویرسنگھ، امیتابھ بچن کے بہت بڑے پرستار ہیں اور تب ہی وہ اکثر مختلف انداز میں ان سے اظہارمحبت بھی کرتےنظر آئے ہیں۔
سپر اسٹار امیتابھ بچن کے حوالے سے یہ بات کہی جاتی ہے کہ جب وہ کسی فنکارکے کام سے متاثر ہوتے ہیں تو اس کے لیے تعریفی نوٹ لکھ کراسےایوارڈ کے طور پر دیتے ہیں۔
اس سے قبل کنگنا رناوٹ فلم’ کوئن اور تنو ویڈز منو ریٹرنز‘، ششانت سنگھ فلم’ ایم ایس دھونی‘ اور دپیکا پڈوکون فلم’ رام لیلا‘ میں شاندارکارکردگی کے سبب امیتابھ بچن کی جانب سے ایسا ہی ایوارڈ لے چکے ہیں۔