ماڈل کالونی میں تالاتوڑ گروپ کی کارروائی، مارکیٹ لوٹ لی

کراچی کے علاقے ماڈل کالونی میں تالاتوڑ گروپ نےپوری مارکیٹ لوٹ لی، دکانداروں کے مطابق ملزمان نے مرکزی جنگلہ کاٹ کر واردات کی ہے۔

دکانداروں کے مطابق ملیر میں ماڈل کالونی کی انارکلی مارکیٹ میں تالا توڑ گروپ نے کارروائی کرتے ہوئے 9 دکانوں سے لاکھوں روپے اور قیمتی سامان لوٹ لیا۔

متاثرہ دکانداوروں کا بتانا ہے کہ ملزمان نے مارکیٹ کی مرکزی گرل مہارت سے کاٹ کر واردات کی۔ ذرائع کے مطابق لٹنے والے دکانداروں میں کپڑے کے تاجر اور درزی شامل ہیں۔

ایک دکاندار نے بتایا کہ اس کی دکان سے ملزمان ایک لاکھ روپے نقد اور قیمتی کپڑا بھی اپنے ساتھ لے گئےجبکہ مارکیٹ میں موجود درزیوں کی دکانوں سے ملزمان گاہکوں کے کپڑے بھی لوٹ کر فرار ہوگئے۔

واردات کی اطلاع ملنے پر ایس ایچ او ماڈل کالونی انار کلی مارکیٹ پہنچے اور دکانداروں کو تنبیہ کرکے چلے گئے کہ آئندہ واردات سے بچنے کے لئے سیکورٹی گارڈ رکھیں۔ اس کے علاوہ پولیس کی جانب سے اس کارروائی کی نہ تو ایف آئی آر درج کی گئی ہے اور نہ مزید کسی قسم کی کارروائی عمل میں لائی گئی ہے۔

اس کے علاوہ علاقہ پولیس کی جانب سے دکانداوروں کو ہدایت کی گئی ہے کہ اس معاملہ کو میڈیا سے دور رکھا جائے۔