طورخم :آن لائن سسٹم کے خلاف کلیرنس ایجنٹس کی ہڑتال

طورخم بارڈرپر تجارتی سامان کی کلیئرنس کے لئے وی بوک آن لائن سسٹم کے خلاف کلیرنس ایجنٹس نے آج سے غیر معینہ مدت کے لئے ہڑتال کا آغازکردیاہے۔ ہڑتال کی وجہ سے افغانستان کے ساتھ ہرقسم کی تجارتی سرگرمیاں معطل ہوگئی ہیں۔

کسٹم کلیئرنس ایجنٹس نے موقف اختیار کیا ہے کہ طورخم بارڈر پر انٹر نیٹ اور بجلی کی سہولیت میسر نہیں جس کے نتیجے میں کسٹم وی بوک پالیسی پر عمل درآمد ممکن نہیں اور سہولیات کی فراہمی تک ہرقسم کے تجارتی سامان کی کلیئرنس کا بائیکاٹ جاری رہے گا۔

اسسٹنٹ کلکٹر طورخم سیدہ صدف علی شاہ کے مطابق ملک کی تمام سرحدوں پر وی بوک پالیسی نافذ ہے اس لیے کسٹم حکام نے طورخم بارڈر پر بھی وی بوک پالیسی کے تحت کلیرنس کو لازمی قرار دیا ہے۔

کسٹم حکام کے مطابق نیشنل لاجسٹک سیل وی بوک پالیسی کے لئے سہولیات فراہم کررہی ہے۔