پیرس میں سجی ’ایک شام محبت ‘

امن کی آشا اور شان پنجاب کی بدولت پیرس میں ’ایک شام محبت ‘ میں پیرس ادبی فورم فرانس اور انسانی حقوق کی تنظیمAuror Dwan کے زیر اہتمام فرانس میں پہلی بار اپنی نوعیت کی ایک منفرد تقریب کا انعقاد کیا گیا-

تقریب میں پاکستان (پنجاب ) اور بھارتی ( پنجاب) کے شعراء ادیب اور گلوکاروں نے شرکت کی-تقریب کے انعقاد کا مقصد دونوں ممالک کی کمیونٹی کے درمیان باہمی رابطہ اور بھائ چارے کی فضا قائم کرنا تھا-

تقریب کو دو حصوں میں تقسیم کیا گیا تھا۔پہلے حصے میں مشاعرہ اور دوسرے حصے میں محفل موسیقی رکھی گئی تھی-

مشاعرے میں اقبال بھٹی، شمیم خان، بٹو بنگڑ سعدی خان، رجت مال، انیلہ حمید، سکھویر سنگھ اور پیرس ادبی فورم کی صدر سمن شاہ نے اپنا کلام سنایا اور حاضرین محفل سے خوب داد سمیٹی-

دونوں طرف کے شعراء نے اپنے خیالات اور شاعری کا تبادلہ کرتے ہوئے امن اور محبت کا پیغام دیا اور اس خواہش کا اظہار کیا کہ ایسے باہمی پروگرام ہوتے رہنے چاہئیں-

دوسرے حصے میں ’محفل موسیقی ‘سجائی گئی۔بٹو بنگڑ، رجت مال، اور شرن چیمہ نے اپنی آواز کا جادو جگا کر محفل کو خوب رونق بخشی-

گیتوں، غزلوں اور قوالی سے پیرس کی یہ شام مہکتی رہی اور دلوں میں ایک خوبصورت احساس چھوڑ گئی-

آرر ڈان تنظیم کے صدر اقبال بھٹی جو پروگرام کے مشترکہ منتظم بھی تھے، انہوں نے اپنے پیغام میں دونوں طرف کی کمیونٹی سے اظہار محبت کرتے ہوئے کہا کہ وہ کشمیر کے مسلمانوں پر ہونے والے مظالم سے دکھی ہیں اور چاہتے ہیں کہ ایسی باہمی تقاریب کے ذریعے امن کی فضا قائم کر کے دونوں ممالک کو مذاکرات کی طرف مائل کیا جائے-اس کے لیے وہ پیرس ادبی فورم کے ساتھ مستقبل میں بھی اپنا تعاون پیش کرنے کے خواہش مند ہیں-

تقریب کے آخر میں پرتکلف عشائیہ سے مہمانوں کی تواضع کی گئی اور یوں ایک حسین شام اپنے انجام تک پہنچی۔