کراچی پر دس ارب ڈالر خرچ کرنے کی ضرورت ہے، عالمی بینک

عالمی بینک نے کہا ہے کہ پاکستان کے شہر کراچی کو اگر زندگی گزارنے کے قابل شہر بنانا ہے تو اس پر دس ارب ڈالر خرچ کرنے کی ضرورت ہے۔ یہ رقم پاکستانی روپے میں تقریبا گیارہ سو ارب روپے بنتی ہے۔

عالمی بینک کی رپورٹ میں کراچی کے اربن ٹرانسپورٹ سسٹم، پانی کی فراہمی اور نکاسی ء آب اور کچرے کو ٹھکانے لگانے کے نظام کی خامیوں کی نشان دہی کی گئی ہے۔ ان خامیوں کی بدولت کراچی کے عوام کے معیار زندگی میں تیزی سے زوال آیا ہے۔

رپورٹ کے مطابق ملک کی کل شہری آبادی کا پانچواں حصہ کراچی میں رہتا ہے۔ اس کے باوجود یہ شہر توجہ سے محروم ہے۔ کراچی میں سیکیورٹی صورت حال بہتر ہوئی ہے لیکن غریب آبادیوں کو فوری توجہ کی ضرورت ہے۔