بھرتیوں،ترقیاتی اسکیموں پر قبل از وقت پابندی،حکومتی نظام رک جائے گا، اپوزیشن لیڈر کا الیکشن کمیشن کو خط

اسلام آباد (نمائندہ جنگ / نیوز ایجنسیز) قومی اسمبلی میں قائد حزب اختلاف سید خورشید شاہ نے الیکشن شیڈول سے قبل بھرتیوں اور ترقیاتی سکیموں پر پابندی کو قبل از وقت قرار دے دیا ہے اور کہا ہے کہ اس سے حکومتی نظام رک جائے گا ، فوری طورپر صوبائی الیکشن کمشنر تعینات کئےجائیں ، تاخیر سےشکوک وشبہات جنم لیں گے ۔ الیکشن کمیشن کے سیکرٹری بابر یعقوب فتح محمد کے نام اپنے خط میں سید خورشید شاہ نے الیکشن کمیشن کی جانب سے یکم اپریل کے بعد بھرتیوں اور ترقیاتی سکیموں پر پابندی کے حکم کو قابل ستائش قرار دیتے ہوئے کہا ہے کہ الیکشن شیڈول جاری ہونے سے قبل یہ پابندیاں قبل از وقت ہیں۔