خیبر پختونخوا، بیشتر نجی اسکول دوسرے روز بھی بند

24 اپریل ، 2018

خیبر پختون خوا پرائیویٹ اسکولز ریگولیٹری اتھارٹی کے خلاف نجی اسکولوں کی ہڑتال جاری ہے، پشاور سمیت کئی صوبے کے کئی شہروں کے بیشتر نجی اسکول آج دوسرے روز بھی بندہیں۔

نجی اسکولوں کی ہڑتال ریگولیٹری اتھارٹی اور اس کے قواعد و ضوابط کے خلاف کی جا رہی ہے ۔

سوات، صوابی، ہنگو، لکی مروت، ڈی آئی خان، اپر ہزارہ ڈویژن، بنوں، لوئر دیر اور ٹانک سمیت خیبر پختون خوا کے دیگر کئی اضلاع میں بھی تمام نجی تعلیمی اداروں میں دو روز کےلیے مکمل ہڑتال ہے۔

واضح رہے کہ پرائیویٹ اسکولز ریگولیٹری اتھارٹی کے جن اقدامات کے خلاف نجی اسکولوں کی جانب سے ہڑتال کی جارہی ہے وہ طلبہ اور ان کے والدین کے مفاد میں ہیں۔

پرائیویٹ اسکولز ریگولیٹری اتھارٹی نے احکامات جاری کیے تھے کہ نجی تعلیمی اداروں کی جانب سے سالانہ فیس میں اضافہ نہیں کیاجائےگا،2بہن بھائیوں میں سےایک سےآدھی ٹیوشن فیس لی جائےگی۔

ریگولیٹری اتھارٹی نے یہ بھی ہدایت کی تھی کہ چھٹیوں کے دوران طلبہ سے آدھی فیس لی جائے گی، اس دوران طلبہ سے ٹرانسپورٹ فیس نہیں لی جائے گی۔

نجی اسکولزکی بندش کے خلاف گزشتہ روز پیرنٹس اسٹوڈنٹس ایسوسی ایشن نے خیبرپختونخوا اسمبلی کے باہر احتجاج کیا، اس موقع پر مظاہرین نے نعرے بازی بھی کی۔

مظاہرین نے ایف بی آر اور نیب سے پرائیویٹ اسکولز مالکان کے خلاف کارروائی کا مطالبہ کرتے ہوئے کہا کہ نجی اسکولوں کو بند کرنا غیرقانونی اور غیر آئینی ہے۔

انہوں نے نجی اسکولوں سے متعلق ہائیکورٹ کے فیصلے پر عمل درآمد کو یقینی بنانے کا بھی مطالبہ کیا۔

خیبرپختونخوا میں پرائیوٹ اسکولز ریگولیٹری اتھارٹی ایکٹ کے نفاذ کے خلاف ہڑتال سے تعلیمی سرگرمیاں بہت متاثر ہورہی ہیں۔

پرائیوٹ اسکولز ایسوسی ایشن کا کہنا ہے کہ نجی تعلیمی اداروں کی مانیٹرنگ سمیت ریگولیٹری اتھارٹی کا قیام منظورنہیں جبکہ والدین کا مؤقف ہے کہ صوبائی حکومت کی جانب سے پرائیوٹ اسکولز ریگولیٹری اتھارٹی ایکٹ ایک درست اقدام ہے۔

تازہ ترین