خواجہ آصف بھی تاحیات نااہل ہوگئے

26 اپریل ، 2018

اسلام آباد ہائی کورٹ نے اقامے پر فیصلہ سناتے ہوئے وفاقی وزیر خارجہ خواجہ آصف کو تاحیات نااہل قرار دے دیا۔

اسلام آباد ہائیکورٹ میں خواجہ آصف کی نااہلی سے متعلق پاکستان تحریک انصاف کے رہنما عثمان ڈار کی درخواست منظور کرتے ہوئے فیصلہ سنا دیا۔

فیصلہ اسلام آباد ہائی کورٹ کے لارجر بینچ کے سربراہ جسٹس اطہرمن اللہ نے سنایا،جسٹس عامر فاروق اور جسٹس محسن اختر کیانی لارجر بینچ کا حصہ تھے۔

اعلیٰ عدالت کی جانب سے خواجہ آصف کو 62ون ایف کے تحت تاحیات نااہل قرار دیا گیاہے جس کے بعد وہ اب اپنے عہدے پر برقرار نہیں رہ سکتے۔

اس سے قبل اقامہ کی بنیاد پر وزیر خارجہ خواجہ آصف کی نااہلی کے لیے اسلام آباد ہائیکورٹ میں درخواست دائر پر جسٹس اطہر من اللہ کی سربراہی میں تین رکنی لارجر بینچ نے دلائل مکمل ہونے اور دستاویزات کا جائزہ لینے کے بعد 10 اپریل کو فیصلہ محفوظ کیا تھا۔

کیس کی سماعت کے دوران عدالت نے حکم دیا تھا کہ اگر اس کیس میں کچھ تحریری چیزیں جمع کرانا ہیں تو کرادیں جس پر خواجہ آصف کے وکیل نے کمپنی کا خط جمع کرایا تھا جس میں بتایا گیا تھا کہ ان کے مؤکل جس کمپنی کے لیگل ایڈوائزر ہیں اس کا نمائندہ عدالت میں پیش ہوکر بیان دینے کے لیے تیار ہے۔

خط میں کہا گیا ہےکہ خواجہ آصف کمپنی کے فل ٹائم نہیں بلکہ پارٹ ٹائم ملازم ہیں۔ عدالت نے تمام دستاویزات کا جائزہ لینے کے بعد کیس کا فیصلہ محفوظ کرلیا تھا۔

فیصلے سے قبل اسلام آباد ہائیکورٹ میںنشستیں بھر گئی تھیں اور کوئی نشست خالی نہیں تھی جبکہ عدالت کے باہر بھی کافی افراد جمع تھے جو عدالت کے فیصلے کا بے چینی سے انتظار کر رہے تھے۔

واضح رہے کہ اس سے قبل سابق وزیر اعظم میاں نواز شریف اور پی ٹی آئی رہنما جہانگیر ترین بھی عدالت کی جانب سے تاحیات نااہل قرار دیے جاچکے ہیں۔

تازہ ترین