جاپان کیلئے پاکستانی بر آمدات میں اضافہ ریکارڈ

17 مئی ، 2018

جاپان کے لیے پاکستانی برآمدات میں گزشتہ سال کے مقابلے میں اٹھارہ فیصد اضافہ ریکارڈ کیا گیا ہے جس سے امید ہے کہ موجودہ سال جاپان کے لیے پاکستانی برامدات چار سو ملین ڈالر سے بڑھ جائیں گی۔

یہ بات جاپان میں پاکستانی کمرشل قونصلر ابو بکر صدیق نے میڈیا سے گفتگو کرتے ہوئے کہی ، انھوں نے کہا ہے کہ حالیہ سالوں میں پاکستانی اشیاء کے معیار میں بہتری اور دونوں ممالک کے تجارتی وفود کے ایک دوسرے کے ممالک میں آنے جانے سے دوطرفہ تجارت میں اضافہ ہوا ہے۔

کمرشل قونصلر نے کہا کہ پاکستانی صنعتکاروں نے جاپان کے لیے اپنے معیار میں بھی بہتری پیدا کی ہے جس سے جاپان میں ان کے لیے آرڈرز میں اضافہ ہوا ہے ۔

پاک جاپان بزنس کونسل کے صدر رانا عابد حسین نے کہا کہ یہ بہت خوش آئند بات ہے کہ پاکستانی برآمدات میں اٹھارہ فیصد اضافہ دیکھا گیا ہے تاہم دونوں ممالک کے صنعتکاروں کی مشترکہ کوششوں اور حکومت کی سرپرستی سے دوطرفہ تجارت میں پچاس فیصد تک اضافہ کیا جاسکتا ہے۔

انہوں نے کہا کہ موجودہ اضافے پر وہ سفارتخانہ پاکستان اور حکومت پاکستان کو مبارکباد پیش کرتے ہیں اور پاک جاپان بزنس کونسل مستقبل میں پاکستانی برآمدات میں اضافے کے لیے اپنا کردار بھی ادا کرے گی ۔

تازہ ترین