اصغر خان کیس میں نواز شریف کی طلبی کا فیصلہ پیر کو ہوگا

18 مئی ، 2018

اصغر خان کیس میں سابق آرمی چیف اور ڈی جی آئی ایس آئی کے بعد سابق وزیراعظم نواز شریف سمیت دیگر افراد کی طلبی کا فیصلہ پیر کو کیا جائے گا۔

ذرائع کا کہنا ہے کہ اس کیس میں احسان صادق کی سربراہی میں کمیٹی کام کے طریقہ کار پر خصوصی پیپرز لکھ رہی ہے، ان خصوصی پیپرز کو اسٹریٹجک دستاویز کا نام دیا گیا ہے۔

ذرائع نے مزید بتایا کہ ان اسٹریٹجک پیپرز میں انکوائری کو حتمی نتیجے پر پہنچانے کے لیے طریقہ کار تحریر ہو گا، جب کہ کیس میں نامزد ملزم سابق وزیراعظم نواز شریف سمیت دیگر کی طلبی کا فیصلہ 21 مئی کو کیا جائے گا۔

واضح رہے کہ سپریم کورٹ نے گزشتہ ہفتے اپنے فیصلے میں حکومت کو اصغر خان کیس پر عملدرآمد کا حکم دیتے ہوئے کہا تھا کہ وفاقی حکومت اور ایف آئی اے کیس کے فیصلے کی روشنی میں قانون کےمطابق کارروائی کریں۔

اصغر خان کیس میں نامزد سابق آرمی چیف جنرل ریٹائرڈ مرزا اسلم بیگ اور آئی ایس آئی کے سابق سربراہ لیفٹیننٹ جنرل ریٹائرڈ اسد درانی 16 مئی کو ایف آئی اے کی تحقیقاتی کمیٹی کے سامنے پیش ہوچکے ہیں۔

تازہ ترین