نگراں حکومت کا پٹرولیم مصنوعات کی قیمتوں میں اضافےکا اعلان

نگراں حکومت نے پٹرولیم مصنوعات کی قیمتوں میں اضافےکا اعلان کردیا،لائٹ ڈیزل کی قیمت میں 6 روپے14پیسے،ہائی اسپیڈ ڈیزل کی قیمت میں 6روپے 55پیسے،مٹی کےتیل کی قیمت میں 4 روپے46پیسے کا اضافہ کردیا گیا۔

نگراں حکومت نے عید الفطر سے قبل عوام پر پیٹرول بم گرادیا اور پٹرولیم مصنوعات کی قیمتوں میں اضافےکا اعلان کردیا۔

حکومت کی جانب سے جاری نوٹیفکیشن کے مطابق پیٹرول کی نئی قیمت 4 روپے 26 پیسے اضافے کے بعد 91 روپے 96 پیسے مقرر کردی گئی ہے۔

لائٹ ڈیزل کی قیمت میں 6 روپے14پیسے کا اضافہ ہوا ہے جس کے بعد نئی قیمت 74 روپے 99 پیسےہو گئی ہے۔

مٹی کا تیل 4 روپے 46 پیسے اضافے کے بعد 84 روپے 34 پیسے فی لیٹر ہوگیا ہے۔

اس کے علاوہ ہائی اسپیڈ ڈیزل کی قیمت میں 6 روپے 55 پیسےکا اضافہ کردیا گیا ہے جس کے بعد نئی قیمت 105روپے 31 پیسے ہوگئی ہے۔

نوٹیفکیشن کے مطابق قیمتوں کا اطلاق 11 جون کو رات 12 بجے سے ہوجائے گا اور یہ قیمتیں 30 جون 2018 تک نافذ رہیں گی۔

دوسری جانب ایف بی آر نے بھی پیٹرولیم مصنوعات پر سیلز ٹیکس میں اضافے کا نوٹیفکیشن جاری کردیا ہے۔

پیٹرول پر سیلز ٹیکس کی شرح 7 فیصد سے بڑھا کر 12 فیصد مقرر کردی گئی ہے جبکہ ہائی اسپیڈ ڈیزل پر سیلز ٹیکس کی شرح 17 فیصد سے بڑھا کر 24 فیصد، مٹی کے تیل پر سیلز ٹیکس کی شرح 7 فیصد سے بڑھا کر 12 اور لائٹ ڈیزل پر سیلز ٹیکس کی شرح 1 فیصد سے بڑھا کر 9 فیصد مقرر کردی گئی ہے۔

سیلز ٹیکس کی نئی شرح کا اطلاق 12 سے 30 جون کے لیے ہوگا۔