کراچی (اسٹاف رپورٹر)ایڈیشنل ڈسٹرکٹ اینڈ سیشن جج جنوبی حفظ الرحمٰن نے ایگزیکٹ کے سی ای او شعیب شیخ و دیگر کے خلاف منی لانڈرنگ سے متعلق کیس میں شعیب شیخ ودیگر ملزمان پر فرد جرم عائد کردی۔ شعیب شیخ سمیت دیگر ملزمان نے صحت جرم سے انکار کردیا۔ عدالت نے آئندہ سماعت پر کیس کے گواہان کو طلب کر لیا۔ عدالت نےکیس کی مزید سماعت چار جولائی تک ملتوی کردی۔استغاثہ کے مطابق ملزمان پر منی لانڈرنگ کے ذریعے قومی خزانے کو کروڑوں روپے نقصان پہنچانے کا الزام ہے۔تفصیلات کے مطابق شعیب شیخ و دیگر ملزمان ایگزیکٹ منی لانڈرنگ کیس میں عدالت میں پیش ہوئے۔ کیس کے دیگر ملزمان میں محمد جنید اور یونس شامل ہیں۔عدالت نے شعیب شیخ و دیگر ملزمان پر فرد جرم عائد کردی۔ شعیب شیخ سمیت دیگر ملزمان نے صحت جرم سے انکار کردیا۔ عدالت نے آئندہ سماعت پر کیس کے گواہوں کو طلب کرلیا ۔ استغاثہ کے مطابق چیف ایگزیکٹوآفیسر ایگزیکٹ پرائیویٹ لمیٹڈ کراچی شعیب احمد شیخ ولد شبیراحمد شیخ کے خلاف 14 اکتوبر 2015 کو ڈپٹی ڈائریکٹر ایکسچینج پالیسی ڈپارٹمنٹ اسٹیٹ بینک آف پاکستان کی مدعیت میں زیر دفعہ 5،8،،22اور23 فارن ایکسچینج ریگولیشن ایکٹ R/W 1947 ، 109 PPC کے تحت ایف آئی آر نمبر 51/2015 سب انسپکٹر ایف آئی اے محمد منصور مہمند نے درج کی،ایف آئی اے نے تحقیقات کرتے ہوئے اہم معلومات اور شواہد حاصل کیے، انکوائری نمبر 42/15کے نتیجے میں یہ بات ثابت ہوئی کہ ایگزیکٹ پرائیویٹ لمیٹڈ کے چیف ایگزیکٹو آفیسر ملزم شعیب احمد شیخ ولد شبیر احمد شیخ نے بیرون ملک حوالہ کے ذریعے غیر قانونی طورپر بھاری رقوم منتقل کیں، منتقل کئے گئے 170.17 ملین روپے شعیب احمد شیخ نےاپنے دیگر ساتھیوں ملزمان ڈائریکٹرچندہ ایکسچینج ۔بی پرائیویٹ لمیٹڈکراچی محمد یونس ولد عبدالستار اور برانچ منیجر ایکسچینج ۔بی پرائیویٹ لمیٹڈ کراچی محمد جنید ولد عبدالکریم کی ملی بھگت سے بیرون ملک منتقل کیے اور ان دونوں ملزمان کے خلاف علیحدہ سے بھی ایف آئی آر نمبر 51/2015 زیر دفعہ 5،8،22،23فارن ایکسچینج ریگولیشن ایکٹ 1947 ایکٹ R/W109 /34PPC کے تحت تھانہ ایف آئی اے کمرشل بینک سرکل کراچی میں مقدمہ درج کیا گیا ہے۔