ضلعی انتظامیہ لاہور کا شہباز شریف کے نام مراسلہ

13 جولائی ، 2018

لاہور کی ضلعی انتظامیہ نے مسلم لیگ ن کے صدر میاں شہباز شریف کے نام مراسلہ جاری کیا ہے۔

ضلعی انتظامیہ کی جانب سے شہباز شریف کے نام مراسلے میں کہا گیا ہے کہ آپ کی سیاسی جماعت کی جانب سے ریلی کی اجازت طلب نہیں کی گئی۔

مراسلے میں مزید کہا گیا ہے کہ الیکشن کمیشن ضابطہ اخلاق کے تحت ریلی یا جلسے سے 3دن قبل اجازت ضروری ہے، پیشگی اطلاع کا مقصد سیکیورٹی انتظامات کو یقینی بنانا ہے۔

ضلعی انتظامیہ لاہور نے مراسلے میں یہ بھی کہا ہےکہ سیکیورٹی اداروں سے جلسہ یا ریلی کے مقام کی رپورٹ لینا ہے، سیکیورٹی کے پیش نظر 13جولائی کو جلسے یا ریلی کی اجازت نہیں دی جا سکتی۔

دوسری جانب مسلم لیگ ن خیبرپختونخوا کا قافلہ لاہور کےلیے روانہ ہوگیا جس کی قیادت صوبائی صدر ن لیگ امیر مقام کر رہے ہیں۔

کارکنوں سے خطاب میں امیر مقام کا کہنا تھا کہ عوام اپنا فیصلہ 25 جولائی کو سنائیں گے۔

ادھر ساہیوال اور فیصل آباد سے بسوں میں اور قافلے کی صورت آنے والے ن لیگی کارکنوں کو پولیس نے روک گیا۔

پولیس کی جانب سےروکے جانے پرکارکنوں نے نعرے بازی کی اور وہ گاڑیاں چھوڑ کر پیدل ہی منزل کی جانب روانہ ہوگئے۔

ن لیگ کے رہنما دانیال عزیز کو بھی ایک مقام پرسیکیورٹی اہلکاروں نے روک لیا ہے۔

واضح رہے کہ مسلم لیگ ن کے کارکن ملک کے مختلف مقامات سے میاں نواز شریف کے استقبال کے لیے لاہور آرہے ہیں جنہیں کئی جگہوں پر روکا گیا۔

اس سے قبل پنجاب پولیس نے مسلم لیگ ن کے رہنماؤں کی نظربندی کے احکامات جاری کر دیے، ڈپٹی کمشنر کو جاری کیے گئے مراسلے میں آئی جی پنجاب نے نظربندی کےاحکامات دیے ہیں۔