زمبابوے کا پاکستان کو جیت کیلئے 68 رنز کا ہدف

پاکستان کے خلاف تیسرے ون ڈے انٹرنیشنل میں زمبابوے نے پاکستان کو جیت کیلئے 68 رنز کا ہدف دیا ہے۔

زمبابوے کی جانب سے کپتان ہیملٹن مساکدزا کی جانب سے ٹاس جیت کر پہلے بیٹنگ کا فیصلہ غلط ثابت ہوا اور پوری ٹیم 25اعشاریہ 1 اوور میں 67 رنز بناکر آؤٹ ہوگئی۔

پاکستان کی جانب سے فہیم اشرف نے شاندار بولنگ کا مظاہرہ کرتے ہوئے 5 شکار کیے ۔جنید خان نے 2، یاسر شاہ، شاداب خان اور عثمان خان شنواری نے ایک ایک وکٹ حاصل کی۔دوسری جانب میزبان ٹیم کے 8 کھلاڑی ڈبل فیگر میں بھی داخل نہ ہوسکے۔

پاکستان اور زمبابوے کے درمیان 5 میچز پر مشتمل سیریز میں قومی ٹیم کودو صفر کی برتری حاصل ہے۔

واضح رہے کہ تیسرے ایک روزہ میچ کے لیے زمبابوے کی ٹیم میں 3 تبدیلیا ں کی گئی ہیں،جبکہ قومی ٹیم میں حسن علی اور محمد عامرکی جگہ یاسر شاہ اور جنید خان کو موقع دیا گیا ہے۔

پاکستانی اسکواڈ میں شامل حارث سہیل بیٹی کی طبیعت کی خرابی کے باعث واپس پاکستان آرہے ہیں تاہم ان کی جگہ اب تک کسی متبادل کو نہیں بلایا گیا۔