عمران نے نیب سے الیکشن کے بعد پیشی کیلئے وقت مانگ لیا

پاکستان تحریک انصاف کے چیئرمین عمران خان نیب کی طرف سے سرکاری ہیلی کاپٹر کیس میں آج طلب کرنے کے باوجود پیش نہیں ہوئے، اپنے وکیل کے ذریعے الیکشن کے بعد پیش ہونے کے لئے وقت مانگ لیا۔

چیئرمین پاکستان تحریک انصاف عمران خان کو نیب خیبرپختونخوا نے سرکاری ہیلی کاپٹر کیس میں آج طلب کیا تھا۔

نیب ذرائع کا کہنا ہے کہ سرکاری ہیلی کاپٹر کے استعمال سے متعلق سوالنامہ تیار کیا گیا ہے۔ عمران خان سے سرکاری ہیلی کاپٹر کے استعمال سے متعلق سوالات بھی پوچھے جانے تھے۔

نیب حکام کے مطابق آج انہیں عمران خان کی جانب سے ایک درخواست موصول ہوئی تھی جس میں انہوں نے انتخابات کے بعد پیش ہونے کی استدعا کی ہے۔

نیب حکام کے مطابق تاحال فیصلہ نہیں ہوا کہ انہیں دوبارہ کب طلب کیا جائے گا۔