خواجہ آصف کے خلاف انکوائری کرنے کی منظوری

قومی احتساب بیورو ’نیب‘ نے سابق وزیر خارجہ خواجہ آصف کے خلاف منی لانڈرنگ کے ذریعے آمدن سے زائد اثاثے بنانے کے خلاف انکوائری کی منظوری دے دی ہے۔

نیب سے جاری کیے گئے اعلامیے کے مطابق چیئرمین جسٹس (ر) جاوید اقبال کی زیرصدارت ایگزیکٹو بورڈ کا اجلاس ہوا جس میں خواجہ آصف کے خلاف انکوائری کی منظوری دی گئی۔

نیب اعلامیے میں کہا گیا ہےکہ خواجہ آصف پر منی لانڈرنگ کے ذریعے آمدن سے زائد اثاثے بنانے کا الزام ہے جس سے قومی خزانے کو 36 لاکھ 68 ہزار 671 ملین روپے کا نقصان پہنچا۔

اس موقع پر نیب ایگزیکٹو بورڈ نے سابق وفاقی وزیر پورٹ اینڈ شپنگ بابر غوری کے خلاف بھی بدعنوانی کا ریفرنس دائر کرنے کی منظوری دی اور اعلامیہ جاری کیا جس میں بابرغوری و دیگر پر غیرقانونی بھرتیوں کا الزام ہے اوران غیرقانونی بھرتیوں سے قومی خزانےکو 2 ارب 85 کروڑ روپےکا نقصان بھی پہنچاہے۔