پاکستان کی نئی حکومت کے ساتھ کام کرنے کے متمنی ہیں، امریکا

21 اگست ، 2018

جنوب اور وسط ایشیا کے لیے امریکا کی نائب معاون وزیر خارجہ ایلس ویلز نے کہا کہ پاکستان کی نئی حکومت کے ساتھ مل کر کام کرنے کے متمنی ہیں اور افغانستان میں استحکام کو بڑھانے میں پاکستان کا اہم کردار ہے۔

واشنگٹن میں میڈیا سے گفتگو کرتے ہوئے ایلس ویلزنے کہا کہ پاکستان اور افغانستان باہمی تعلقات بہتر بنانے کے لیے کئی ماہ سے کوشش کررہے ہیں، پاکستان اورافغانستان کےدرمیان تعلقات کی کوشش کی بھرپور حمایت کرتے ہیں۔

انہوں نے کہا کہ پاکستان اور افغانستان دونوں میں امن سے متعلق وزیراعظم عمران خان کی بات کا خیر مقدم کرتے ہیں۔

ایلس ویلز نے مزید کہا کہ ہم نے تشویش ظاہر کی ہے کہ دہشت گرد گروہ پاکستان میں محفوظ پناہ گاہیں انجوائے کررہے ہیں جس وجہ سے ہم پاکستان سے مطالبہ کرتے ہیں کہ وہ ان تنظیموں کے خلاف مزید کارروائی کرے، وقت آگیا ہے کہ تمام فریق مذاکرات کی میز پر آئیں، چاہتے ہیں پاکستان بھی اسی پیغام کو تقویت دے۔

امریکا کی نائب معاون وزیر خارجہ کا کہنا تھا کہ پاکستان طالبان کو مذاکرات کی میز پر لائے یا واپس افغانستان دھکیل دے۔

تازہ ترین