’’ماجد خان کو سی ای او بنانے کی خبر میں صداقت نہیں ‘‘

پا کستان کرکٹ بورڈ کے چیئرمین احسان مانی کا کہنا ہے کہ چیف ایگزیکٹو آفیسر کا عہدہ پاکستان کرکٹ بورڈ کے آئین میں موجود ہے لیکن انہوں نے وزیر اعظم عمران خان کے سامنے اس عہدے کے لیے ماجد خان کا نام تجویز نہیں کیا۔

ایک انٹرویو میں نئے چیئرمین پی سی بی احسان مانی کا کہنا تھا کہ وہ میڈیا ڈیپارٹمنٹ کو بھی پیشہ ورانہ انداز میں چلانا چاہتے ہیں ۔

احسان مانی نے اس خواہش کا اظہار کیا کہ میڈیا کو ایک ہی جگہ سے خبریں اور معلومات فراہم کی جائیں جیسا کہ آئی سی سی اور دیگر کرکٹ بورڈز میں ہوتا ہے اسی لیے انہوں نے بورڈ میں غیر ضروری واٹس ایپ کے استعمال پر پابندی عائد کردی ہے۔

انہوں نے کہا کہ ماجد خان کو چیف ایگزیکٹو آفیسر بنائے جانے کی تجویز سے متعلق خبر میں کوئی صداقت نہیں ہے۔

پاکستان کرکٹ بورڈ کے آئین میں چیف ایگزیکٹو آفیسر کا عہدہ موجود ہے اور وہ بھی چاہتے ہیں کہ پاکستان کرکٹ بورڈ کے معاملات آئین کے مطابق چلائے جائیں، لیکن ابھی اس پوزیشن کےلئے کسی کے نام پر غور نہیں کیا گیا۔