امریکی سینیٹ کمیٹی میں جج اور ان پر الزم لگانے والی پروفیسر کی طلبی

امریکی صدر ڈونلڈ ٹرمپ کی جانب سے سپریم کورٹ کے لیے نامزد جج بریٹ کوانا اور ان پر الزام لگانے والی یونیورسٹی خاتون پروفیسر کرسٹائین بلیسی فورڈ آئندہ پیر 24 ستمبر کو سینیٹ کمیٹی کے سامنے پیش ہو کر بیانات ریکارڈ کرائیں گے۔

کمیٹی چئیر مین سینیٹر چک گریسلے نے کہا ہے کہ ڈاکٹر فورڈ کی طرح اگر کوئی اور بھی سامنے آئے تو اسے سنا جانا چاہیے، امریکی سینیٹ کی جوڈیشل کمیٹی معاملے کی چھان بین کر رہی ہے۔

کرسٹائین بلیسی فورڈ نے بریٹ کوانا پر 36 سال پہلے نو عمری میں خود پر جنسی حملے کا الزام لگایا ہے۔

کرسٹائین بلیسی فورڈ کا کہنا ہے کہ یہ واقعہ اس وقت پیش آیا جب وہ اور کوانا دونوں 20سال سے کم عمر تھے۔

وائٹ ہاوس کی سینئر مشیر کیلئین کون وے نے بھی چھان بین کی حمایت کی ہے،انہوں نے کہا ہے کہ خاتون کے الزامات کو دیکھنا چاہیے۔

بریٹ کوانا نے الزامات کی تردید کی ہے اور بیان دینے پر رضامند ہیں۔

اس معاملے پر امریکی صدر ڈونلڈ ٹرمپ کہتے ہیں کہ معاملے کی چھان بین کے باعث اگر سینیٹ کے تصدیقی ووٹ میں تاخیر بھی ہو جائے تو ہرج نہیں۔