ملک بھر میں نو محرم الحرام کے جلوس اختتام پذیر

کراچی میں نواسہ رسول حضرت امام حسین رضی اللہ تعالیٰ عنہ اور اُن کے رفقا کی لازوال قربانی کی یاد میں 9 محرم الحرام کا جلوس نکالا گیا ۔ اس موقع پر سیکورٹی کے سخت ترین اقدامات تھےجبکہ سڑکیں اور موبائل فون سروس بند رکھی گئی ۔ جلوس روایتی راستوں سے ہوتا ہوا حسینیہ ایرانیاں کھارادر پر اختتام پذیر ہوگیا ۔

حضرت امام حسین رضی اللہ تعالی عنہ اور ان کے رفقا کی عظیم قربانی کی یاد میں کراچی کے مختلف علاقوں سے جلوس نکالے گئے جو نمائش چورنگی پر اختتام پذیر ہوئےجس کے بعد نشتر پارک میں مجلس برپا کی گئی۔

جلوس سی بریز، ایمپریس مارکیٹ، ریگل چوک، ریڈیو پاکستان سے ہوتا ہوا، امام بارگاہ حسینیان ایرانیان کھارادر پر اختتام پذیر ہوگیا، جلوس کی سیکورٹی کے لیے ایم اے جناح روڈ کے اطراف کی تمام گلیوں کو کنٹینرز لگا کر بند کردیا گیاتھا جبکہ راستے میں آنے والی تمام دکانوں اور کاروباری مراکز کو سیل کیا گیا۔

مرکزی جلوس کی سیکورٹی کے لئے پولیس اور رینجرز کی بھاری نفری تعینات کی گئی جبکہ بلند عمارتوں پر ماہر نشانہ باز بھی موجود تھے۔

دوسری جانب کراچی پولیس چیف ڈاکٹر امیر شیخ نے بھی مرکزی جلوس کادورہ کیا اور سیکورٹی انتظامات کا جائزہ لیا۔

لاہور

لاہور میں 9 محرم الحرام کا مرکزی جلوس امام بارگاہ پانڈو اسٹریٹ اسلام پورہ سے برآمد ہوا جو مقررہ راستوں سے ہوتا ہوا اسی مقام پر واپس آکر اختتام پذیر ہوگیا۔

اسلام آباد

اسلام آباد میں 9 محرم الحرام کا مرکزی جلوس سیکٹر جی 6 ٹو امام بارگاہ سے برآمد ہوا جو مختلف راستوں سے ہوتا ہوا مقررہ مقام پر اختتام پذیر ہوا۔

پشاور

پشاور میں نویں محرم الحرام کا شبیہہ علم و ذوالجناح کا مرکزی جلوس مخصوص راستوں سے ہوتا ہوا اختتام پذیر ہوگیا۔

پشاورمیں نویں محرم الحرام کا شبیہہ علم و ذوالجناح کا مرکزی جلوس صبح 10 بجے امام بارگاہ حسینیہ ہال صدر روڈ کینٹ سے برآمد ہوا۔ماتمی جلوس مقررہ راستوں سے ہوتا ہوا فوارا چوک پہنچا جہاں نماز ظہرین ادا کی گئی، اس موقع پر عزادار سینہ کوبی اور زنجیر زنی کرتے رہے۔

کوئٹہ

کوئٹہ میں نویں محرم الحرام کے سلسلے میں شبیہہ ذوالجناح کا جلوس نکالا گیا، جلوس کے موقع پر سکیورٹی کے سخت انتظامات کیے گئے تھے۔

جلوس دو پہر کو میکانگی روڈ پر واقع امام بارگاہ ناصر العزاء سے برآمد ہوا، جلوس کے موقع پر عزادار سینہ کوبی اور نوحہ خوانی کرتے رہے۔نویں محرم کےجلوس کے روٹ پر جانےوالے راستوں کو سیل کر دیا گیا تھا جبکہ اس دوران جلوس کے روٹ اور اطراف میں کاروباری مراکز اور دکانیں بھی بند رہیں۔

دوسری جانب جلوس کی سکیورٹی کے لیے پولیس کے 600 سے زائد اہلکاروں کے علاوہ ایف سی اہلکار بھی تعینات کئے گئے تھے جبکہ جلوس کی سی سی ٹی وی کیمروں کے ذریعے مانیٹرنگ بھی کی گئی، بعد میں شبیہ ذوالجناح کا یہ جلوس اپنے مقر رہ راستے سے ہوتےہوئے امام بار گاہ ناصر العزا پر اختتام پذیر ہوگیا۔

گوجرانوالہ میں مجموعی طور پر 103 جلوس نکالے گئے جب کہ مرکزی جلوس امام بارگاہ حویلی سادات سے برآمد ہوگا جب کہ ملتان میں 9 محرم الحرام کا مرکزی جلوس امام بارگاہ ممتاز آباد سے برآمد ہوگا۔

راولپنڈی میں 9 محرم الحرام کا مرکزی جلوس امام بارگاہ فاطمیہ چیٹیاں ہٹیاں سے برآمد ہوا جو اقبال روڈ کالج روڈ سے ہوتا ہوا امام بارگاہ کرنل مقبول حسین جاکر اختتام پذیر ہوا۔

محرم الحرام کے موقع پر چمن میں پاک افغان سرحد پر باب دوستی اور تفتان میں پاک ایران سرحد پر زیرو پوائنٹ اور راہداری گیٹ دو روز کے لیے بند کردی گئی ہے۔