سعد رفیق اور سلمان رفیق کی عبوری ضمانت منظور

15 اکتوبر ، 2018

لاہور ہائیکورٹ نے مسلم لیگ نون کے رہنماوں خواجہ سعد رفیق اور سلمان رفیق کی عبوری ضمانت منظور کرلی ہے اور انہیں گرفتار کرنے سے روک دیا ہے۔

لاہور ہائیکورٹ کے جسٹس علی باقر نجفی کی سربراہی میں 2 رکنی بینچ نے خواجہ سعد رفیق اور ان کے بھائی سلمان رفیق کی درخواست پر سماعت کی جس سلسلے میں دونوں بھائی عدالت کے روبرو پیش ہوئے۔

خواجہ سعد رفیق اور سلمان رفیق نے عدالت میں مؤقف اپنایا کہ وہ نیب کے ساتھ مکمل تعاون کررہے ہیں جبکہ نیب انہیں ہراساں کررہی ہے اور گرفتار کرناچاہتی ہے، ان پر جو الزامات ہیں اس سے متعلق نیب میں تمام ریکارڈ فراہم کردیا ہے۔

سعد رفیق کے وکیل کا کہنا ہے کہ نیب لوگوں کوانکوائری کےلیے بلاتاہے اورگرفتارکر لیتا ہے۔

درخواست گزاروں نے استدعاکی ہے کہ نیب نےانہیں 16 اکتوبر کو طلب کیا ہےاور خدشہ ہے کہ انہیں غیر قانونی طور پر گرفتار کیا جاسکتا ہےلہذا نیب کوممکنہ گرفتاری سےروکاجائے۔

عدالت نے درخواست گزاروں کا مؤقف سننے کے بعد ان کی ضمانت قبل از وقت گرفتاری منظور کرتے ہوئے نیب کو 24 اکتوبر تک گرفتار کرنے سے روک دیا۔

واضح رہے خواجہ سعد رفیق اور سلمان رفیق کے خلاف نیب میں پیراگون ہاؤسنگ سوسائٹی کی تحقیقات جاری ہیں اور اس میں ممکنہ گرفتاری سے بچنے کے لیےانہوں نے اسلام آباد ہائیکورٹ میں درخواست دائر کی تھی جسے عدالت نے مسترد کرتے ہوئے لاہور ہائیکورٹ سے رجوع کرنے کی ہدایت کی تھی۔

تازہ ترین