ڈینگی سے چوکنا رہیں۔۔۔

16 اکتوبر ، 2018

اکتوبر اور نومبر کے مہینے پاکستان میں ڈینگی مچھر کے حوالے سے احتیاط برتنے اور پیشگی اقدامات کے لئے حساس نوعیت کے حامل ہیں اگرچہ یہ وبا سال میں دو مرتبہ نمودار ہوتی ہے تاہم سابقہ تجربات کی روشنی میں رواں سیزن میں لوگوں کو بہت چوکنا رہنا چاہئے۔پنجاب میں 2007 ء کے پہلے اور دوسرے سال سیکڑوں ہلاکتوں اور پھر پشاور میں گزشتہ سال 900سے زائد مریضوں میں ڈینگی کی تشخیص اور 10ہلاکتوں کے بعد جس طرح حکومت کیساتھ شہریوں نے بھی اس سے بچائو کے اقدامات میں تعاون کیا یہ اگرچہ ایک بڑی کامیابی ہے لیکن آئندہ بھی اس سے غافل نہیں ہونا چاہئے کیونکہ ماہرین کے بقول یہ مرض پشتوں تک انسان کا پیچھا کرتا ہے۔ ان دنوں بھی راولپنڈی، پشاور اور کراچی میں ڈینگی کے کئی کیس سامنے آئے ہیں جن میں سے 317راولپنڈی کے مختلف اسپتالوں، 36 پشاور 572 سندھ جن میں سے 538 کراچی میں رجسٹرڈ ہوچکے ہیں اور جب تک ملک میں ڈینگی کا ایک کیس بھی موجود ہے یہ ہمارے لئے مستقل چیلنج بنا رہے گا۔ اگرچہ ماضی کے تجربات کی روشنی میں شہریوں کے اندر ڈینگی سے بچائو کے بارے میں شعور پیدا ہوا ہے اور وہ اپنے گھروں کی حد تک حفاظتی اقدامات بھی کرنے لگے ہیںلیکن معاملے کی نوعیت ایسی ہے کہ اکیلے شہری اس کا مقابلہ نہیں کرسکتے خصوصاً بارشوں کے بعد اب بھی بہت سے مقامات ایسے ہیں جہاں کھڑے پانی میں ڈینگی کی پرورش کے امکانات پائے جاتے ہیں ۔ لہٰذا اس مقام پر جہاں ڈینگی سر اٹھا سکتا ہے بلاتاخیر محکمہ صحت کی جانب سے مچھر مار سپرے کو یقینی بنایا جائے، ڈینگی کا مرض بدقسمتی سے ایک آفت ہے جو جاندار سے آتی ہے اور جاندار ہی اس کا شکار ہوتا ہے لیکن یہ حقیقت ہے کہ بہت سے ملکوں نے ٹھوس اور اجتماعی کوششوں سے اس پر مکمل قابو پالیا ہے۔ ہمیں بھی اس موذی مرض کی بیخ کنی تک چین سے نہیں بیٹھنا چاہئے۔

اداریہ پر ایس ایم ایس اور واٹس ایپ رائے دیں00923004647998

تازہ ترین