یورپ کا سب سے بڑا مالیاتی اسکینڈل

یورپ کا سب سے بڑا مالیاتی اسکینڈل سامنے آگیا، ڈنمارک کے ڈانسکی بینک کی اسٹونیا برانچ سے 235 ارب ڈالر کی منی لانڈرنگ ہوئی۔

غیر ملکی ٹی وی چینل کی ایک رپورٹ کے مطابق یورپ کے شمال میں واقع چھوٹے سے ملک اسٹونیامیں ڈنمارک کا سب سے بڑا بینک ڈانسکی سرمایہ کاری کرتا ہے ۔

ڈانسکی بینک کی اسٹونیا برانچ سے 10 سالوں میں 200ارب یورو تقریبا 235 ارب ڈالر زکی مشکوک ٹرانزیکشنز ہوئیں، میڈیا ذرائع کے مطابق ڈنمارک کی فنانشل سپروائزری اتھارٹی نے معاملے کی تحقیقات بینک کے ساتھ مل کر کی ہیں۔

رپورٹ کے مطابق مشکوک ٹرانزیکشن روس اور سابقہ روسی ریاستوں سے کی گئیں، اسٹونیا اور روسی ایجنسیاں ان کی نشاندہی 2007 سے کرتی آ رہی ہیں لیکن بہتر کاروبار کے سبب بینک کی اعلیٰ قیادت نے اس پر توجہ نہیں دی۔

اسٹونیا سے رقم براستہ لندن ٹیکس ہیون ممالک تک پہنچائی گئی لیکن رقم کا حتمی مالک کون ہے یہ پتہ نہیں لگایا جاسکا ہے، جبکہ معاملے کی تحقیقات فن لینڈ، فرانس اور برطانیہ نے بھی شروع کر دیہے۔

واضح رہے کہ فن لینڈ اور روس اسٹونیا کے پڑوسی ممالک ہیں، جبکہ اسٹونیا کی آبادی قریب سوا تیرہ لاکھ ہےاور اس کی معیشت قریب 45 ارب ڈالر کی ہے ۔