-
فرمان الہی
-
نماز کے اوقات
- منگل14؍شوال المکرم 1445ھ 23؍اپریل 2024ء
- بانی: میرخلیل الرحمٰن
- گروپ چیف ایگزیکٹووایڈیٹرانچیف: میر شکیل الرحمٰن
فرمان الہی
نماز کے اوقات
مسجد الحرام میں صفائی کی ذمّے دار انتظامیہ نے 85 سے زیادہ سعودی نوجوان تیار کیے ہیں جو مسجد حرام کے صحن، گزر گاہوں اور چھت کی صفائی کے لیے مخصوص جدید گاڑیوں کو چلانے اور ان کی دیکھ بھال و مرمت کا کام انجام دے رہے ہیں۔
مذکورہ نوجوانوں کو ان خصوصی گاڑیوں کے استعمال کے حوالے سے مطالعاتی اور عملی تربیت کے کورسز مکمل کرائے گئے ہیں۔ علاوہ ازیں مسجد حرام میں آنے والے نمازیوں، معتمرین اور حجاج کرام کے ساتھ اچھے برتاؤ کے لیے خصوصی آگاہی لیکچروں کا بھی انعقاد کیا گیا۔
صفائی کی گاڑیاں چلانے کے دوران لوگوں کی حفاظت کا خیال رکھنے کے لیے خصوصی ہدایات فراہم کی گئی ہیں۔
مسجد حرام میں صفائی اور کارپٹنگ کے شعبے کے ڈائریکٹر نائف الجحدلی کے مطابق پرانی مشینوں کو نئی مشینوں سے تبدیل کر دیا گیا ہے جو مطاف کے صحن کی صفائی کے حوالے سے زیادہ فعال ہونے کے ساتھ ساتھ جدید ٹیکنالوجی کی حامل ہیں۔ اس سلسلے میں مسجد الحرام کے فرشوں اور دیگر مقامات کی مطلوبہ صفائی انجام دینے کے لیے سعودی عملے کی تربیت کا اہتمام کیا گیا ہے۔
الجحدلی نے واضح کیا کہ حرمین کے امور کی جنرل پریذیڈنسی اس بات کے لیے کوشاں ہے کہ مسجد الحرام کے اندر صفائی اور دھلائی کے لیے تمام تر آلات خود کار ہو جائیں تا کہ ہاتھ سے دھلائی کے طریقے سے بے نیاز ہوا جا سکے۔
دوسری جانب مسجدالحرام میں گاڑیوں کے ذریعے صفائی انجام دینے والے سعودی نوجوانوں نے اس ذمّے داری اور خدمت کو اپنے لیے سعادت مندی اور بڑا اعزاز قرار دیا۔
ان نوجوانوں کا کہنا ہے کہ اللہ کے گھر کے اندر اللہ کے مہمانوں کے واسطے صفائی کا کام انجام دینا ان کے دلوں کو بہت راحت اور سکون پہنچاتا ہے۔
اس سلسلے میں دھلائی کا پہلا مرحلہ صبح چھ بجے سے سوا سات بجے تک جاری رہتا ہے جبکہ دوسرا مرحلہ صبح نو بجے سے سوا دس تک انجام دیا جاتا ہے۔
