نیو کراچی میں جنریٹر کی دکان سے نوجوان کی لاش برآمد

نیوکراچی میں سندھی ہوٹل کے قریب جنریٹر کی دکان سے نوجوان کی لاش ملی ہے، پولیس نے واقعے کی تحقیقات کے لیے دکان کے مالک کو حراست میں لے لیا ہے۔

اہل خانہ نے الزام عائد کیا کہ 25 سالہ احسن کے جسم پر تشدد کے نشانات موجود ہیں۔

پولیس کے مطابق 25 سالہ احسن کی لاش جنریٹر کی دکان سے ملی ہے، نوجوان کو جنریٹر لے جانے اور کرایہ ادا نہ کرنے پر دکان کے مالک نے بلوایا تھا۔

جنریٹر شاپ کا مالک نوجوان کو دکان میں بند کرکے کھانا کھانے چلا گیا تھا اور جب واپس آیا تو نوجوان کی لاش دکان سے برآمد ہوئی۔

پولیس نے جنریٹر شاپ کے مالک عدنان کو حراست میں لے کر تفتیش شروع کردی ہے۔

پولیس کا کہنا ہے کہ پوسٹ مارٹم رپورٹ کا جائزہ لینے اور لواحقین کے بیانات کے بعد مقدمہ درج کیا جائے گا۔