شیخوپورہ میں آئل ٹینکر اور ٹرک میں تصادم، ایک شخص جاں بحق

شیخوپورہ میں منڈیالی ٹول پلازہ پر آئل ٹینکر کو پیچھے سے آنے والے تیز رفتار ٹرک نے ٹکر مار دی جس سے آئل ٹینکر میں آگ بھڑک اٹھی، آگ سے جھلس کر ایک شخص جاں بحق ہوگیا۔

ریسکیو ذرائع کے مطابق شیخوپورہ کے منڈیالی ٹول پلازہ پر تیل سے بھرا آئل ٹینکر ٹول ادا کرنے کے لیے کھڑا تھا کہ پیچھے سے آنے والا ایک تیز رفتار ٹرک اس سے ٹکرا گیا جس سے آئل ٹینکر میں آگ بھڑک اٹھی، آگ اس قدر شدید تھی کہ اس نے آئل ٹینکر، ٹرک اور ٹول پلازہ کے 3 بوتھس کو بھی اپنی لپیٹ میں لےلیا۔

آئل ٹینکر، ٹرک کے ڈرائیورز نے کود کر اور ٹول پلازہ کے عملے نے بھاگ کر اپنی جانیں بچائیں جبکہ ٹکر مارنے والا ٹرک کا کلینر جھلس کر ہلاک ہوگیا۔ فائربریگیڈ کی 5 گاڑیوں نے موقع پر پہنچ کر آگ پر قابو پایا۔