جے یو پی نورانی کے زیر اہتمام عیدمیلادالنبی ﷺکے سلسلے میں کار موٹر سائیکل ریلی

کوئٹہ (اسٹاف رپورٹر) جمعیت علماء پاکستان (نورانی) ضلع کوئٹہ کے زیر اہتمام جمعہ کو عید میلاد النبی ﷺ کے سلسلے میں کار موٹر سائیکل ریلی نکالی گئی ، جامعہ غوثیہ رضویہ انوار باہو وحدت کالونی سے نکالی جانے والی ریلی کے شرکاء مختلف شاہراہوں سے ہوتے ہوئے منان چوک پہنچے ، جہاں ریلی کے شرکاء سے مفتی محمد جان قاسمی اور ضلعی صدر مفتی احمد رضا قاسمی نے خطاب کرتے ہوئے کہا کہ حضور اکرم ﷺ کی آمد سے دنیا سے تاریکیوں کا خاتمہ اور ہر طرف اجالا ہوا اور ہم عید میلاد النبی ﷺ قیامت تک مناتے رہیں گے ، انہوں نے کہا کہ یہ کائنات نبی اکرم ﷺ کیلئے تخلیق کی گئی اور آپ ﷺ کی آمد سے تاریکی روشنوں میں تبدیل ہوگی ، حضورﷺ کی آمد پر گھروں کوچوں میں چراغاں کرنا ، محفل میلاد کا انعقاد ہمارے لیے بہترین عمل ہے ، انہوں نے کہا کہ حضور اکرم ﷺ کی شان میں گستاخی کرنے والوں پر ہم واضح کرنا چاہتے ہیں کہ تحفظ ناموس رسول ﷺ کیلئے ہم کسی بھی قربانی سے دریغ نہیں کرینگے ، انہوں نےحکومت پر زور دیا کہ آئین کے آرٹیکل 295 سی کو مزید مضبوط بنایا اور اس پر عمل درآمد کرتے ہوئے نبی اکرم ﷺ کی شان میں گستاخی کرنے والوں کو کیفر کردار تک پہنچایا جائے ، ریلی میں قاری نور محمد ، قاری ہدایت حبیبی ، میر احمد زہری، سراج احمد زہری، قاری محمد یونس حبیبی ودیگر علماء کرام نے شرکت کی ۔