بچوں کو غذائی قلت سے بچائیں

04 دسمبر ، 2018

جیو نیوز کے پروگرام میں اس انکشاف کے بعد کہ پاکستان میں پیدائش کے28دن کے اندر ہونے والی بچوں کی اموات کی شرح دنیا میں سب سے زیادہ جبکہ تھرپارکراس لحاظ سے ملک بھر کے اضلاع میں سرفہرست ہے جہاں یہ شرح 80فیصدسے بھی زیادہ ہے۔اس تشویشناک صورتحال کی بڑی وجہ غذائی قلت ہے جوانتہائی غربت کامنطقی انجام ہے تاہم ماہرین کا کہنا ہے کہ ان علاقوں میں خواتین کو مکمل غذا،صحیح علاج اورادویات دینے سے ان80فیصد بچوں کی جانیں بچائی جاسکتی ہیں۔اس کے ساتھ ساتھ ملک کے دیگر دوردراز علاقوں میں بھی صورتحال پرنظر رکھنے کی ضرورت ہے۔تھرپارکرصوبہ سندھ کاانتہائی پسماندہ ضلع ہے جہاں لوگ غربت کی لکیر سے بھی نیچے زندگی گزارنے پر مجبور ہیں۔ ڈسٹرکٹ ہیڈ کوارٹر اسپتال مٹھی میں آئے روزکم وزن اورغذائی قلت کے شکار بیشتر بچے موت کی آغوش میں چلے جاتے ہیں۔ اسپتال میں سہولتوں کے فقدان کی خبریں بھی میڈیا پرآتی رہتی ہیں۔ ضلع کابڑا حصہ ریگستانی ہونے کے باعث یہاں پینے کے تازہ پانی کے ذرائع نہیں ہیں، واحد ذریعہ کنویں ہیں جن کاپانی صحت کے لئے مضرہے۔ماہرین خواتین میں کم عمری کی شادیوں،غذائی قلت اور بچوں کی پیدائش میں وقفہ نہ ہونے کوان ہلاکتوں کی بڑی وجہ بتاتے ہیں۔انہوں نے خدشہ ظاہرکیا ہے کہ اگر موجودہ حالت برقرا رہی تو آئندہ دس بارہ سال تک ہمارا ملک دنیا میں خوراک کی کمی سے سب زیادہ متاثر ہونے والے ملکوں میںسے ایک ہوگا تاہم متذکرہ پروگرام میں سندھ کے مشیر صحت نے صورتحال کوبہتر بنانے کاعندیہ دیتے ہوئے ڈسٹرکٹ ہیڈکوارٹر اسپتال مٹھی میں تمام ترسہولیات اورادویات موجود ہونے کادعویٰ کرتے ہوئے کہاہے کہ حاملہ یابچے کودودھ پلانے والی خواتین کے خاندانوں کو تین ماہ راشن دیا جائے گا اور لیڈی ہیلتھ ورکرز گھر گھر جاکر آگاہی فراہم کریں گی۔ یہ اچھی پیشرفت ہے تاہم اس پروگرام پرسختی سے عمل کرنے کے لئے اس کی مسلسل نگرانی ضروری ہے۔

اداریہ پر ایس ایم ایس اور واٹس ایپ رائے دیں00923004647998

تازہ ترین