کراچی: 3 گٹکا فروش اور اسٹریٹ کریمنل گرفتار

کراچی میں گزشتہ رات ملیر کینٹ پولیس نے کارروائی کے دوران مختلف علاقوں میں گٹکا فروخت کرنے والے تین ملزمان کو گرفتار کر لیا جبکہ چاکیواڑہ سے اسٹریٹ کریمنل کو گرفتار کرلیا گیا۔

پولیس کے مطابق گٹکا فروش تینوں ملزمان کی گرفتاری گشت کے دوران عمل میں آئی۔

ملزمان کے قبضے سے اسمگل شدہ چھالیہ اور گٹکے کی بوریاں برآمد کی گئی ہیں۔

پولیس کے مطابق ملزمان اسمگل شدہ چھالیہ اور گٹکا شہرکے مختلف علاقوں میں سپلائی کرتے ہیں، ملزمان کے خلاف مقدمہ درج کر لیا گیا ہے۔

دوسری جانب پولیس نے چاکیواڑہ میں میراں ناکہ کے قریب اسنیپ چیکنگ کے دوران بس میں سوار ملزم کامران کو گرفتار کر کے اسلحہ برآمد کر لیا۔

ملزم اسٹریٹ کرائم کی متعدد وارداتوں میں ملوث ہے۔