’ہر فلم کو اپنی بیٹی کی طرح سمجھتا ہوں‘

بالی ووڈ کے کنگ شاہ رخ خان کا کہنا ہے کہ وہ اپنی ہر فلم کو اپنی بیٹی سہانا خان کی طرح سمجھ کر کرتے ہیں۔

بالی ووڈ کے شہنشاہ شاہ رخ خان کوحال ہی میں ریلیز ہونے والی فلم زیرو کی ناکامی کے باعث شدید تنقید کا نشانہ بنایا گیا لیکن انہوں نے اپنے اوپر ہونے والی تنقید پر کسی قسم کے ردعمل کا اظہار نہیں کیا بلکہ انہوں نے کہا کہ اپنی ہر فلم کو اپنی بیٹی سہانا خان کی طرح سمجھ کر کرتے ہیں۔

دکن کیرونیکل کی ایک رپورٹ کے مطابق شاہ رخ خان نے کہا کہ وہ اپنی ہر فلم کو اپنی بیٹی کی طرح سمجھتے ہیں، جس طرح لوگ اپنی بیٹی کی شادی پرکسی چیز کی کمی نہیں ہونے دیتے وہ بھی اپنی فلموں کے معاملے میں ایسے ہی ہیں۔

اُن کا کہنا تھا کہ وہ کوئی بھی نئی فلم بناتے وقت یہ ضرور سوچتے ہیں کہ وہ اپنی بیٹی کی شادی پر خرچ کر رہے ہیں اور جس طرح کوئی بیٹی کی شادی کے وقت اُمید کرتا ہے کہ وہ خوش ہوگی، وہ بھی اسی طرح اُمید رکھتے ہیں کہ ان کی فلم کامیاب جائے گی اور بہت سارے پیسے کمائے گی۔

اس کے علاوہ شاہ رخ خان نے کہاکہ اگر انہیں بالی ووڈ کا بادشاہ کہا اور سمجھا جاتا ہے تو اُن پر لازم بھی ہے کہ وہ مشکل اور غیر معروف فیصلے بھی کریں، کیوں کہ جو ایسا نہیں کرتا وہ بادشاہ ہی نہیں ہوتا۔

آخر میں انہوں نے کہا کہ وہ مشکل فیصلے لینے کی وجہ سے ہی ایک کامیاب اداکار بنے اور اُنہیں احساس ہے کہ اگر وہ بادشاہ ہیں تو انہیں اپنے فیصلے اپنی مرضی سے کرنے چاہئیے اور ایسے میں مشکل اور غیر معروف فیصلے بھی کرنا پڑتے ہیں۔