نواز شریف کی اپیل کی سماعت 21 جنوری کو ہوگی

10 جنوری ، 2019

نواز شریف کی جانب سے دائر العزیزیہ اسٹیل ریفرنس میں سزا کے خلاف اپیل کی سماعت 21 جنوری کو ہو گی ۔

اسلام آباد ہائی کورٹ میں نواز شریف نے 7سال قید اور جرمانوں کی سزا کے خلاف اپیل دائر کر رکھی ہے ، جبکہ اس اپیل کے ساتھ ہی ان کی سزا معطلی کی درخواست بھی سنی جائے گی۔

نواز شریف کی اپیل پر جسٹس عامر فاروق اور جسٹس محسن اختر کیانی پر مشتمل بینچ سماعت کرے گا۔

گزشتہ روز جسٹس عامر فاروق اور جسٹس محسن اختر کیانی پر مشتمل ڈویژن بینچ نے محمد نواز شریف کی درخواست پر مختصر سماعت کے بعد رجسٹرار آفس کو 10 دن میں اپیل سماعت کے لیے مقرر کرنے کے احکامات جاری کیے تھے۔

اس سے قبل سابق وزیراعظم کی جانب سے ہائیکورٹ میں متفرق درخواست دائر کی گئی تھی جس میں استدعا کی گئی تھی کہ العزیزیہ اسٹیل ملز ریفرنس میں سزا کے خلاف اپیل جلد سماعت کے لیے مقرر کی جائے۔

واضح رہے کہ احتساب عدالت نے 24 دسمبر کو العزیزیہ ریفرنس کا فیصلہ سناتے ہوئے نواز شریف کو 7 سال قید و جرمانے کی سزا سنائی تھی جس پر سابق وزیراعظم نے احتساب عدالت کے فیصلے کیخلاف پہلے یکم جنوری اور پھر 4 جنوری کو اسلام آباد ہائیکورٹ میں درخواست دائر کی، تاہم دونوں مرتبہ رجسٹرار آفس نے اعتراض لگا کر درخواست واپس کر دی تھی۔

تازہ ترین